Also als wiit merken mogen
kolom a
7055Die van symon ende van iudas
Voeren te gadre als ict las
Iegen den here van beset [1]
Ende begrepene in haer strec
X∙M man sloegen si in die stede
7060Den here sloegen si oec mede
Som die hande ende tie voete
Doe seide hi aldus onsoete
Ben ic met rechte begaer[2]
Want aldus gedanc daer
7065Dedic wilen in minen dagen
Lxx coninge die lagen
Onder mine tafle ende crumen aten
Met hem voer si achter straten
Ende wonnen iherusalem met brande
7070Daer lieten si sonder voete ende hande
Adombeseth ende hi bleef doot
Mar dat verstaet al bloet
Dat si iherusalem niene besaten
Want david alreerst hare straten
7075Danen iagede die iebuseen
Ende droeger crone alst wel sceen
Iudas gheslachte wan ascalon
Gasen ende oec acharon
Mar die woenden in die dale
7080Mochtmen niet verwinnen wale
Met wagene die an beiden siden
Met zekelen[3] tvolc ontwee sniden
Hadden si so bewaert dat lant
Dat siit hilden metter hant
Die ghene die geboren waren
Van ietro moyses sweer te waren
Enten volke volgede mede
Om dat si hem die beste stede
Indie woistine wisen souden
7090Daer si best logieren wouden
Ende des geloefde hem moyses
Van den besten des siit gewes
Te goedene int heilige lant
Dies so voer hi altehant
7095Wonen onder iudas geslachte
Die beesten wonnen daer met crachte
Dese so hieten siney[4]
Beniamins kinder woenden daer bi
Ende voeren te iherusalem
7100Ende maectent eygiin onder hem
kolom b
Die iebuseen oec also wel
Effrayms kinder voeren in betel
Dat lusa[5] hiet menighen dach
Eer iacob daer die ledre sach
7105Die stede belagen si dan
Daer sagen si vortcomen ∙i∙ man
Dien vingen si ende seiden sech ons dat
Hoemen best comt in die stat
Wi sellent di lonen utermaten
7110Hi wiset hem hine dorst niet laten
Also wonnen si die stede
Vele wonnen si daer den man mede
Makeden si rike ende lieten varen
Ende ontliifden niet te waren
7115Als hem god hiet tvolc van chanaan
Mar si hildense al eygine man
Also daden al die gheslachte
Doe si tlant wonnen met crachte
Hadsise liever eygin dan doot
7120Al wast dat hem god verboet
Ende wonnen tlant ende worden rike
Ende so weldich sekerlike
Dat si der wet vele ontvochten[6]
Enten wapine niet en dochten
7125Doe sende god ∙i∙ stic daer na
Sine ingel in galgala
Doe tvolc van israel daer quam
Voer hi danen als hi ware gram
Dat hi wilde tere ander stede
7130Ende die liede volgeden mede
Daer verweet hem onse here
Dat goet entie grote ere
Die hi hem dede daer te voren
Ende dat si hulde hadden gesworen
7135Metten volke van chanaan
Ende laet daer toe bliven dan
Hare outaere al onghebroken
Iegen twort dat god heeft sproken
Des sellen die afgode van den lande
7140U noch siin te groter scande
Dies weende tvolc al gemene
Dies hiet die stat dal van wene
Si gingen thuus ende menich iaer
Dienden si gode daer naer
7145Tote dattie oude waren doot
- ↑ beset: Bézek Richteren 1:4.
- ↑ begaer: begeerte, verlangen
- ↑ zekele: sikkel, zeis
- ↑ siney: Keniet, lid van het nomadenvolk der Kenieten (Vulg. Cinaei).
- ↑ lusa: Luz (Vulg. Luza Hist.Schol. Luzam (acc.)), plaats in Palestina, later Betel genoemd. Bijbel: Gn 28:19, Hist.Schol. Lib.Gen. Cap.LXXIII
- ↑ ontvochten: van ontvechten: ergens aan ontkomen door zich te verzetten zich onttrekken aan het gezag van iets of iemand onmogelijk zijn er niet in slagen
