Pagina:Van die beroerlicke tijden in die Nederlanden vol 1.djvu/18

8

VAN DIE BEROERLICKE TIJDEN IN DIE NEDERLANDEN.

want tontstack aestelic overal, als een vier dat, in stroo ende stoppelen onsteken zijnde, metten winden herwaert ende ghinswaert ghedreven wert, ende aldaer voetsel vindende, voorder ende voorder onsteect.
Den derden in hoijmaent, preecte tot Stalendriesche, bij Ghendt, Nicasius Van der Schuere voornoemt, beghinnende ooc curts naer den ix hueren vanden avonde, ende daer waren joncheeren te peerde, die tgemeen volc meenden dat zij onder hemlien hadden den grave van Batenburch. Dese leedden den predicant mede, trocken ooc ontrent Audenaerde om die predicanten ende leeddense (alzoo men zeijde) naer haerlier landt, moghelic ghehoort hebbende dat stranghe mandement up tfaijt van deser predicatie, dat van mij vrauwe de regente zoude ghepublieert zijn. Niemant en was dese manniere van doene wijs. Tvolc welfde daerwaert niet met honderden maer met duysenden, maer almeest ghemeen puepel die lettel te verbueren hadde; waer af dat sommighe van hemlieden spraken menigheranden ongheschaefden caut achter straten, ghelijc dat onder eenen grooten hoop volcx altijts eenighe quaetwillige zijn. Deen schiet van zijn wijf omdat zij hem hier inne niet volghen en wilde; dander sprack tot eenige joncvrauwe: ghij zult curts wel weten hoe schamel lieden te moede es; ander zeijden (ziende eenighe rijcke lieden passeren): ic en wilde niet dat ic zoo rijcke ware als dien man; waer up een ander vraechde: waerom dat? Omdat ic, zeijde hij, om mijns ghoets wille niet doot gesmeten en zoude werden. Ander noumdem broeder Pieter De Backere ende broeder Lievin Van den Bossche, predikheeren, met eenen fremenuer oft twee die jeghen dheretijcquen pleghen te predicken ende qualic ghemint met sommighe zijn, dat zij zouden duer de spijssen ghejaecht werden, Andere, hoorende dat men jeghen eeni-