dat de mensche voor hem selven niet beters, en conde wenschen dan eenen voorspoedighen, ghelijckformigen ende ghelucksalighen loop zijnes gantschen levens, sonder aenstoot oft eenighe quade teghencomste: Nochtans haddet ons gestadichlick moghen al na onsen wensch gaen, ende en ware den haet der Spaensche natie metgaders haren aenhangheren ons niet teghenghevallen: So souden wy nu moeten dit voordeel missen van alsulck een ghetuyghenis, als onse vyanden selve ons hebben ghegheven: het welcke wy achten de schoonste blomme van den crans der eeren te wesen, waer mede wy noch voor den eynde onses levens wel begheert hadden verciert te werden. Jae wat can ter weerelt doch aenghenamer wesen, insonderheyt den ghenen die voor hem ghenomen heest een soo groot ende wtnemelick werck te volbrenghen, als daer is de wederkeeringhe van de vryheit eenes soo goeden volcx, zijnde door so snoode luyden verdruckt: dan totter doot toe ghehaet te werden van zijnen ende des vaderlandts vyanden ende door hares eyghenen mondts-belijdenisse te ontfanghen, een lovelick ghetuyghenis van zijner ghetrouwicheyt tot den zijnen, ende stantvasticheyt teghen de tyrannen, ende teghen de ghene die de ghemeyne ruste zijn
