van de kercken, prophanatie van de heylige Sacramenten, moordaden, oft vanckenissen van Bisschoppen, Pastoren, Jesuijten, Religieusen, so vrouwen, als mans-personen, ende van verscheyden andere wereltlicke, deugdelicke ende eerlicke persoonen, vernieuwende alle de wetten ende Magistraten, afstellende teghens alle regel ende orden van rechten, privilegien, usantien ende oude herkomen ende observantien, die Presidenten, Raetsluyden, Gouverneurs van plaetsen, Baillius, Provoosten, Drossaten, Scholteten, Schepenen, ende ander Catholicke Officieren ende Amptlieden t'onswaers ende totten welvaren, ruste ende vrede van den lande geaffectioneert zijnde, stellende in plaetse van dien extraordinaerlick, ende deur zijn eygen authoriteyt, ende dickmael deur oproer van t'gemeyn volck by hem op geroeit (onder de welcke hy regeert ende triumpheert) alle ketters, sectarisen, seditieuse ende oproerige menschen, levende op roven ende stelen, ende andere zijns gelijke: in der vougen, dat hy alle saken gebracht heeft tot een confusie dier aller tyrannichste, barbarischste ende moordadichste, als oyt ghehoort oft gesien is geweest. 'T Welck mishaghende sekere Catholicksche landen ende provintien, ende sonderlinge siende de conscientien der goeder luyden soo grotelicx geopprimeert, geweldicht ende verdruct, die kercken, cloosters, abdijen, sloten, casteelen, ende huisen van Edel-luyden ende andere goede personagien afgeworpen, ende hun goederen allen boesen menschen te proye gegeven, ter discretie ende geliefte van desen vreemdelinc ende uitlander, ende den ganschen staet van den lande
