van den Spaignaerden hem naerstheyts nyet anders soucken dan onder haere regieringhe ende onverdraghelicker slavernye, jammer ende miserie te brenghen ende te houden de zelve landen, die contracte, verbonden ende previlegien van welcke zy daghelicx overtreden nyet yegenstaende, de welvaert van dese lande daer ganscelick an hanght, ende die by Zynder Majesteyt solempnelen eede gheaffirmeert, gheconfirmeert ende besworen zyn, tot groote onutsprekelicke verachtinghe van Zynder Majesteyt, scade ende verlies van den zelven landen, pooghen daerenboven by die instellinghen ende vernieuwinghen van den placaten vut te royen het zuver wordt Godts, om dies te ghebenghelicker haer opset ende voornemen te volbrenghen in ander omligghende landen, als men metter daet ghesien heeft in Vranckerycke, alwaer de zake verreenicht wesende by middele van zeker liberteyt van religie, het voorseyt coninckrycke in oproer ghestelt hebben, zulex dat, hun voernemen voortganck nemende, die voorscreven landen ghescapen zyn nyet alleenelyck beroeft te blyvene van haeren contracte, verbonden ende previlegien, maer ghebrocht te werde in zulcker slavernye, dat nyemandt van zynen leven ofte goeden, jae ooc van den eere van zynder huusvrauwe ende dochteren zal blyven verzekert, ghemerct doer valsche accusatien ende lasteringhen ghebannen worden alle de ghuene die, om haerlieder tirannye niet te ziene, vut die landen vertrocken zyn, ende andere gevanghen worden, die binnen der zelven landen gheblieven zyn, hem eenichssins suspect wesende, om in eenen weghe te beter d'overhandt over die zelve landen te cryghen, ende hun te voersien by middele van confiscatien : welck al zaken zyn die nyet behooren verdraghen te werdene van den ghuenen die affectie draghen tot den dienst van den Majesteyt, ende welvaert van den zelven landen, ghemerct die groote ghetrauwicheyt die de inwoenders van den zelven lande tot alle tyde bewesen hebbe. Soe cyst dat wy eernstelick versocht wesende by die inwoenders van den zelven landen, zo wel van weghen het evangelium als die roomsche kercke, ende begherende hierinne te voersiene, by advise van den ghemeenen staten van den zelven landen, om die te behouden in dienste van Zyne Majesteyt, een yder in vrydom ende liberteyt van zynder
