camere naest syne garderobbe, ghepresenteert heeft eene requeste, hebbende in den andere handt een corte pistole, met dewelcke hy Syne voornoemde Excellencie eene schote gegeven heeft door de kaeken, treffende van boven ende vuytcommende benedens neffens de kele. Doer welcke verradelick daedt terstont de geheele stadt van Andtwerpen tot tachtig vandelen in de waepene gheloopen es, ende den voorgenoemde spaenschen jonghen vermoort door de hallebardiers van Syn Excellencie. Over hem syn bevonden sekere ghedrooghde padden, doer 't middel van dewelcke hem beleyt was dat hy soude invisible syn, ende hadde ooc de bulle van den paus, inhoudende absolutie ende verghyfnesse naer costume. Syne meester, ghenaempt Aniastro, altyts ghewoont hebbende binnen Andwerpen, is donderdaghs laetsleden hier doer Brugghe ghepasseert, ende, soo wy verstaen, is nu binnen Grevelinghen. Wy verstaen ooc dat den voornoemde jonghen over twee jaeren ghewoont heeft binnen Brugghe, met eenen Bosco, conchierge van het huys van Biscayen, welcke te dier oirsaecke ghister avont in vanghenesse ghecommandeert es, eensdeels oic overmits den voornoemde Aniastro, laestmael doer Brugghe passerende, als voorscreven is, logerde ten huyse van den voornoemden Bosscho. Den pape, an denwelcken den jonghen hem ghebiecht hadde, is oic t'Andwerpen ghevanghen; ende dit syn de vruchten der leedigher misse, die op den voornoemden sondagh eerstmael ghedaen ende inghelaeten was.
De ghedeputeerde van Andwerpen schryven ons dat den docteur van Syne Excellencie, Josephus Michaëli, goede hope heeft van het leven van Synder Excellencie, vuyte dien dat noch den gheitaeder, noch de tonghe, noch eenich ander periculeus let gheinteresseert es, dat het alleenelick eene vleeschwonde es, ende dat de spraecke selfs niet belemmert sal wesen. De vreese is alleenelick dat luna in ariete de hooftwonde periculeus maect; doch men bevyndt niet dat het loot gheenvenimeert es gheweest. God gheve dese landen de ghenade, dat sy de teghenwoordicheit van Synder Excellencie noch vele jaeren moghen ghebruycken........ Te Brugghe, den xxen martii 1582.
P. S. Hier gaen mede de briefe van Syne Altese aen ulieder
