voughen dat hy, zonder te gheven eenich ghecrysch ofte verzucht, ter voorseiden plaitse doot ghebleven es; darnaer, ten zelven daghe ghevoert up een stellinghe up de Maert, ende den anderen daechs ghequartiert, ende zyn hooft ghestelt up een stake. Hy was bevonden ghewapent te zyne jeghens alle slaghen met veele treffelicke cruyskens ghesneden vuyt een casuyle ; dezelve ghenaeyt waeren, U zynder verzekertheyt, in zyn wombaeys ; boven dese met een groene wassenkeerste, item met een agnus Dei, zeer weygerlick ghezonden tot zynder beschermenisse van den paus van Roomen, voorzien wezende met diversche briefvekens inhoudende conjuratien, ende met eene ghedroochde padde, singuliere cracht hebbende, zoo hy ghepersuadeert was, omme te gaene invisible.
Dit zyn de listighe practicquen ende middelen daermede den spaenschen coninck ende den Heyligen Vader in rebus desperatis pooghen te overwinnen deze aerme ende simpele guesen!
De borghers deser stadt, alle in wapene wezende, zeere bedrouft zynde ende hebbende in memorie den moordt van Paris, waren ghedelibereert ’t faict up zyne Vorstelicke Ghenade ghecommitteert te wreken up de Francoisen, ten ware Zyne Excellencie ’tzelve promptelick hadde belet, mits ontbiedende neffens hem den collonnellen deser stadt, endc niet alleenlick excuserende Zyne Alteze up dit faict, maer hemlieden daerboven grotelick recommanderende ende belastende tot bewysinghe van alle eere, vrientscap ende onderdanicheyt in den person van Zyne Alteze.
Wy zyn zeere verblyt te verstaene dat Zyne Excellencie redelick ghedisponeert es, dat oock de chirurginen verclaersen gheen dangier van doot in dezelve wonde gheleghen te zyne, ende houden hemlieden daerof wel verzekert: waerof God almachtich, wien alle eere moet toeghescreven zyn, denwelcken niet en ghedoocht dat een haer van onsen hoofde zonder zyne wille zal gheweert worden, grotelicx es te loven ende bedancken. Tot welcken fyne, metsgaders tot het welvaren ende convalescentie van Zyne Vorstelicke Ghenade, alhier gheboden ende onderhouden es gheweest, woensdaghe laetsleden, wezende den xxjen deser maendt, eenen ghemeenen bidtdach ende vastendach. Wy laten
