5.
in persoone is ghecomen met 4. duysent mannen, ende heeft t’Casteel beschoten, ende doen bestormmen, ende t’selve inghenomen, maer geen volck vermoort dan in ghenade ghenomen, ende hevet alle ghevanghen ghenomen cleyn, ende groot, ende eenen Jonghen Heer van Trautmans Dorff mede ghenomen naer Crembs ghevoert, ende wilt hem dwinghen den Keyser te sweeren, ende te huldighen.
Wt Weenen den 18. April.1620.
Tot Weenen wert nu den Rijcx-dach ghehouden waer oock ghekomen zijn de Legaten vande gepretendeerden Coninck ende andere affgheweken Landen die veel dingen versoecken ende meenen te vercrijghen t ghene de andere Keyseren gheconsenteert hadden, maer ten sal haer soo wel niet ghelucken.
Inden bovenghemelden slach zijn ghebleven den Baron Houbitz uyt Moravien, ende ses andere Baenderheeren uyt Bohemen. Van s’Keysers volc den Grave van Hardrech.
De acht duysent Musquettiers diemen uyt Italien verwachten, zijn aenghekomen tot Gretz.
Men wilde sterck segghen dat den Turck op weghen was om hem met de Bohemyschen te versamelen, maer heeft te rugghe moeten trecken nae Egypten, daer een groote revolte opgheresen is, want Babylonien is hem affgheweken, ende andere Steden met dese inspannen.
