PLACCAERT VANDE
STATEN GENERAEL VANDE
ghevnieerde Nederlanden, Bijden vvelcken, mits den redenen in't langhe in't selfde begrepen, men verclaert den Coninck van Spaegnien vervallen vande Ouerheit en heerschappije van dese voors. Nederlanden: ende verbiet sijnen naem ende zegel inde selue Landen meer te gebruycken, &c.
DE Staten generael vande gheunieerde Nederlanden. Allen dengenen die dese teghenwoordighe sullen sien ofte hooren lesen, saluyt. Also een yegelick kennelick is, dat een Prince van den lande van Godt gestelt is hooft over zijne ondersaten, om de selue te bewaren ende beschermen van alle onghelijk, overlast en ghewelt, ghelijck een herder tot bewaernisse van zijne Schapen: En dat d'ondersaten niet en sijn van Godt geschapen tot behoef van den Prince, om hem in alles wat hy beveelt, weder het goddelick oft ongoddelick, recht oft onrecht is, onderdanig te wesen en als slaven te dienen: maer den Prince om d'ondersaten wille, sonder dewelcke hy egheen Prince en is, om de selve met recht en redene te regeeren, ende voor te staen, en lief te hebben als een vader zijne kinderen, en een herder zijne schapen, die zijn lijf en leven set om deselve te bewaren. En so wanneer hy sulcks niet en doet, maer in stede van zijne ondersaten te beschermen, deselve soeckt te verdrucken, t'ouerlasten, heure oude vryheyt, privilegien en oude hercomen te benemen, en heur te gebieden ende gebruycken als slaven,
