worden. Maer consenteren allen ende eenen yegelicken, 't zy onse ondersaten of andere, tot executie van dese onse declaratie ende verclaringhe, den selven te arresteren, becommeren, beletten, ende hem van zynen persoon te versekeren, Jae oock te hinderen, aentasten ende offenderen so wel in zijne goederen als aen zijn lijf ende persoon: Exponerende ende overleverende den selven Wilhelm van Nassau, ter beliefte, spot, ende proye van eenen yegelicken, als vyand van den menschelicken geslachte, ghevende eenen yegelicken alle zijne goederen, roerlijke ende onroerlicke, waer die gestaen of gelegen mogen zijn, wie de selve sal connen nemen, aenveerden ende becomen: uitghesondert de goederen tegenwoordelick onder onse handt, gebruik ende possessie wesende. Ende ten eynde 't selfde te eer ende met meerder vliet ende spoed gedaen ende volbracht mag worden, ende om onse ondersaten te geringer van dese tyrannije, oppressie ende verdruckinghe te verlossen, ende op dat de deugt ende vroomheid gepresen, ende die boosheyt ende misdaet gestraft worde, beloven wy in Conincklicke ende Princelicke woorden, ende als Godts dienaer, dat indien yemand 't zy onse ondersaet of uitheemse, sich so vroom ende grootmoedich, ende tot onsen dienst, ende der gemeyne welvaert so vyerich liet bevinden, dat hy by eenighe middel dese onse ordinantie conde executeren, ende sich quijt maken van dese voorsz. peste, ons den selven overleverende doot of levende, of dien selfs van den leven berovende: wy den selven sullen doen gheven ende furnieren voor hem ende zijne erfgenamen in gron-
