en begheeren: Nochtans dewijle dat ghylieden in deser weerelt alleene de ghene zijt, den welcken wy met eede verplicht zijn, ende aen de welcke alleene wy ons houden verbonden te wesen: jae die alleene vermeucht onse daden te loven ofte te schelden: Soo willen wy als dan ons oock te vreden ende voor voldaen houden, als wy sullen van uwent weghe een ghetuyghenis ontfanghen hebben, over een stemmende met onse intentien ende voornemen, de welcke noyt en zijn verscheyden gheweest van uwe welvaert, dienst ende nutticheyt: ja wy willen als dan gheeme ende gheduldichlick lijden, dat andere volcken ende natien van den selven oordeelen elcke naer hare passien ende eyghen sinnelickheyt, ofte ymmers (t'ghene dat wy veel liever saghen) nae de redelickheyt ende gherechticheyt, achter dat sy alle voor oordeel sullen hebben asgheleyt ende haer verstant bevrijdt van alle duyster wolcken deser grootheden, die hen mochten hier te vooren t'ghesichte verblint ofte verdonckert hebben.
Soo nu onse vyanden stracks waren ghecommen tot aen t'rechte poinct van dese verbanninghe, ende hadden voortghebracht de redenen op de welcke ghefondeert is dese wreede ende barbarische sententie (die ghe-
