Alle twelck hoewel wij zeecker achten ghenoech buyten dispute te wesen, hebben nochtans noodich bevonden hier te verhalen, overmidts vele persoonen hier van seer onseeckerlijck ende verscheijdelijck gevoelen de vergaderinge vanden Staten anders niet Respecterende, dan nadat hen goet dunckt de qualiteijt vande personen op de vergaderinghe comparerende te meriteren ende van alle saecken die aldaer worden gehandelt oordeelende in allen schijne of de voorschreven personen die uten Eedelen ende bij den Steden worden gedeputeert op de vergaderinghe vanden Staten, hen selven waren vraghende als zijnde de Staten ende over sulcks als hebbende de Souverainiteijt inde hoochste macht vanden Lande, naer haren welghevalle van alle saecken den staet vanden Lande betreffende waren disponerende, retournerende oversulcx alle de handelingen der selver tot haren perticuliere laste, haet ende nijt maer deghene die naerder inziet tgene voren verhaelt is, ende andere groote saken bijden Princen vanden Lande met hulpe vanden Staten te weghe bevrocht ende insonderheyt tgene tsedert den tijdt van vijftien Jaeren herwaerts inden Landen van Hollandt met Westvrieslant ende Zeelant is ghepasseert, can lichtelijck bemercken dat d'authoriteyt vanden Staten niet en bestaet int beleyt authoriteyt ofte macht van EEE of EL personen min ofte meer die op haer vergaderinghen zijn comparerende ende de Aghenten vanden Coninck van Spangien selfs die met dusdanighe argumenten teghen onse saecken altijdt hebben ghemineert ende ghesocht te brenghen in cleynachtinge d'authoriteyt vanden Staten, hebben metter daet nu wel bevonden hoe grootelijck sij in alzulcken opinie zijn gheabuseert ende misleydt gheweest.
Omme dan te ontdecken waeruyt de authoriteyt van den Staten is spruytende, soo staet te considereren dat de Princen die oyt wettelijcken hebben gheregiert niet alleen
