rie en is van haere beginsele, de personen eens vercoren zijnde, dienen haer leven oft Poorterschap lange gheduyrende in plaetse vanden genen die sterve, oft haer Poorterschappen verlaten, worden bij t'selve Collegie tot hare ghelieven gecoren andere personen uit t'middel der Burgeren, tot vervullinge van 't getal. Bij dese Collegien allene is de macht omme te adviseren, Resolveren en disponeren van alle saecken concernerende den staet vanden Lande en der Stede respective: Ende wat t'selve Collegie adviseert, resolveert ende disponeert, wert bij de gansche burgerie ghevolcht, daer teghen noyt eenighe inbreck oft oppositie vande burgheren is ghevallen.
Bij dese Collegien worden Jaerlijks ghecoren de ordinarise Magistraten, te weten vier, drie of twee Burgemeesters ende seven oft meer Schepenen, omme te dienen voor een Jaer. In sommige Steden gheschieden dese electien absolutelijck, inde sommighe bij nominatie van dobbel ghetal, daer uyt bijden Stathouder de verkiesinge van tghewoonlijck ghetal wert gedaen. Der Burghermeesters offitie is bevolen het ordinaris beleyt ende gebiet in alle politijcque saecken, so wel de adminisetratie van Stadsgoederen ende innecomen, als den welstant ende bewaringhe der Steden betreffende.
De Collegien vande Schepenen vaceren ordinarie tot d'administratie vande Justitie, soo in alle Criminele als Civile saecken, ende hebben ende exerceren alle hooghe middelen ende laghe Jurisdictien.
In dese Collegien van Magistraten worden absolutelijk bericht de Regieringhe der Steden van Hollant, Westvrieslant ende Zeelant, meest al ghenoech op eenen wet, sonder dat de Princen vanden Lande hen de regie-
