IIII. Ende alsoo volgende de Goddelijcke, natuerlijcke ende beschreven rechten in den heyligen echten staet, als in eene ordeninge Gods tot eerlick onderhout ende verbreydinge des menschelicken geslachts ingesteld, tusschen dengenen, die malcanderen in bloede ofte swagerschap binnen sekeren grade zijn bestaende, verboden is houwe- lijcke te contracteren, ende dat wel eenige verscheydenheyt ende duysterheijt in de berekeninge derselver graden, bysonder van maechschap van de syde commende, wort bevonden, soo is 't, dat de staten de verboden graden hiernae hebben doen uutdrucken, ten eynde eenen yegelijcken des te beter daervan mach worden onderricht ende egheene ignorantie en pretenderen. Ordonnerende ende verbiedende oversulcx, dat egeene persoonen van wat qualiteyt, conditie ofte gesintheyt sy zijn, binnen de naevolgende uutgedructe graden malcanderen in bloede ofte affiniteyt bestaende, t'samen en sullen mogen gevoecht worden, nochte eenichsints malcanderen trouwen, op pene, dat deselfde niet alleene van onwaerden gehouden, maer ooc syluyden in lijf ende goet gestraft sullen worden, sulcx naer beschreven rechten tegens den incestueusen ende bloetschendingen is ghestatueert.
V. In den eersten en mogen niet trouwen eenige ascendenten met heure descendenten, te weten ouders ende kinders opwaerts ende nederwaerts gaende, in infinitum.
VI. Insghelijcx niet broeders met hare susters, 'tzy van volle oft halve bedde.
VII. Ten derden en moghen niet trouwen de oomen met heure nichten, dat is met heure broeders- ofte susters- kinderen ofte kintskinderen ende descendenten, nochte insghelijcx de moeyen met heuren neven, dat is met heuren broeders- ofte susterssoon, nochte kints-kinderen ofte descendenten, beyde in infinitum, also oomen ende moeyen ten respecte van heure voorsz. nichten ende neven staen in de plaetse van vader ende moeder.
VIII. Ende sovele als 't aengaet de graden van affiniteyt ende swagerschap, alsoo de bandt des houwelijcx alsulcke ghemeenschap medebrenght, dat manne ende wijf maer eene en zijn, soo is 't insgelijcx verboden ende gemterdiceert, dat de man met egheene bloedtverwanten ofte maghen van zijne overleden huysvrouwe, noch de vrouwe met egheene bloetverwanten ofte magen van haren overleden man, denselven man ende vrouwe binnen de voorsz. uutgedruckte graden bestaende, malcanderen niet en sullen trouwen, op gelijcke pene van onwaerde ende straffe in lijf ende goede als vooren. Namentlijck dat egeenen man trouwen en mach met zijn schoondochter, dat is mette naegelaten weduwe zijns soons, noch mette weduwe van zijns soons ofte dochters sone ende soo voorts nederwaerts, of met egeene weduwe eeniger zijner descendenten; gelijck ooc egeene vrouwe trouwen en mach met haren schoonsone, dat is mette man van hare overleden dochter, noch metten man van haers soons ofte dochters dochtere, ende also vervolghende met egeene man, geweest hebbende van eenige hare descendenten.
IX. Insgelijckx egheene man mach trouwen met zijn stiefdochter, dat is mette voordochter zijnder huysvrouwe, noch met eenige van deselve sijne voordochteren descendenten; gelijck ooc egeene vrouwe trouwen en mach met haer stiefsone, dat is mette voorsone van haren overleden man, noch met eenigen descendenten van deselve hare stiefsonen.
X. Item egeene man mach trouwen de nagelaten weduwe van zijnen overleden broeder, noch egeene vrouwe den man van hare overleden suster.
XI. Hierenboven en mogen niet trouwen den man met de weduwe sijnder neve, dat is met de weduwe van zijns broeders ofte susters sone, noch mette weduwe van eenige sijne broeders ofte susters descendenten; gelijck ooc egeene vrouwe trouwen mach mette naegelaten man van hare nichte, dat is mette weduwenaer van haer broeders oft susters dochter, noch mette man van heure eenighe broeders oft susters kints-kinderen ende descendenten.
XII. Ende also in 't aengaen ende contraheren van den heyligen echten staet bysonder goet regard dient genomen, dat 'tzelfde geschiet in alder eerbaerheyt, ende dat alle confusien der voorsz. graden (daerdeur groote swaricheden in de successien ende anderssints rijsen) verhoet worden, so is 't, dat de voorsz. staten ordonneren, dat indien eenige persoonen versochten heure geboden omme t'samen gevoecht te worden, dewelcke nochtans de ghedeputeerde van de magistraten ofte kerckendienaren souden beduncken, dat ten respecte van de voorsz. eerbaerheyt, ende omme confusie van graden te schouwen, niet en behooren t'samen ghevoecht te worden, dat alsdan de voorsz. gedeputeerde ende
