gedrongen zijnde, by ghemeynen accoorde, deliberatie ende ouerdraghe, den Coninc van Spaegnien verclaert hebben, ende verclaren mits desen, ipso jure, vervallen van zijne Heerschappye, gerechticheyt, en erffenisse van de voorsz. Landen: ende voortaene van egheene meyninghe te zijne den seluen te kennen in eenighe saken, den Prince, zijne Hoocheyt, Jurisdictie ende Domeynen van dese voorsz. landen raeckende, sijnen naem als Overheer meer te gebruycken oft by yemanden toelaten gebruyct te worden Verclarende oock dien volghende alle Officiers, Justiciers, Smale Heeren, Vassalen, ende alle andere Inghesetene van den voorsz. Lande, van wat conditie oft qualiteyt die zijn, voortaene ontslaghen vanden eede die sy den Coninck van Spaegnien, als Heere van dese voorsz. Landen gheweest hebbende, moghen eenichsins ghedaen hebben oft in hem ghehouden wesen. Ende gemerckt uut oorsaken voorsz. den meestendeel vande geunieerde Landen, by gemeynen accoorde en consente van heure leden, hebbe hun begheven ghehadt onder de Heerschappije ende Gouvernemente vanden doorluchtighen Prince den Hertogh van Anjou op seker conditien en poincte, met sijne Hoogheyt aenghegaen en gesloten, dat oock de doorluchticheyt vanden Eertzhertoghe Matthias het Gouvernement generael van den Lande in onse handen heeft gheresigneert ende by ons is gheaccepteert gheweest, Ordonneren ende beuelen allen Justiciers, Officiers ende andere die t'selfde eenichsins aengaen ende raken mag, dat sy voortaene den naem, titele, groote ende cleyne zeghelen, contrezeghelen ende cachetten van den Coninck van Spaegnien verlaten ende niet meer en ghebruycken: En dat in plaetse van dien, so langhe de Hoocheit vanden voorsz. Hertogh van Anjou, om nootelicke affairen, het welvaren van dese voorsz. Landen rakende, noch van hier absent is (voor so vele den Landen met de Hoocheyt vanden voorsz. Hertogh van Anjou gecontracteert hebbende aengaet) ende andersins d'andere by maniere van voorraet ende provisie sullen aennemen ende ghebruycken den tijtele ende naem van 't Hooft ende Landtraet: Ende middeler tijde dat t'selfde Hooft ende Raeden volcomelik ende dadelick ghenoemt, beschreven ende in oeffeninghe van hennen staet ghetreden sullen zijn, onsen voorsz. name. Wel verstaende dat men in Hollandt ende Zeelant sal ghebruycken den naem vanden hooghgeboren Vorst den Prince van Orangien ende de Staeten vande selue Landen, totter tijdt toe den voorsz. Landtraedt datelick sal inghestelt wesen, ende sullen hun alsdan reguleren achtervolgende de consenten, by hunlieden op de Instrucktie vanden Lantraet ende contract, met sijne Hoocheyt aenghegaen. Ende in plaetse van des voorsz. Conincks zeghelen, men voortaene gebruycken sal onsen grooten zeghel, contrezeghel ende cachetten, in saecken, raeckende de ghemeyne regeringhe, daer toe den Landtraedt volghende heure Instructie sal gheauthoriseert wesen: maer in saecken, rakende politie, administratie van Justitie, ende andere particuliere, in elck lant besondere, sal gebruyckt worden byde Provinciale ende andere Raden den naem ende titele ende zeghel vanden Lande respectivelick, daer t'selfde valt te doene, sonder ander: al op de pene van nulliteyt vande brieven, bescheeden oft depeschen, die contrarie van t'ghene voorsz. is, ghedaen oft gheseghelt zullen wesen. Ende tot beter ende sekerder volcominghe ende effectuatie van t'gene voorsz. is, hebben geordonneert ende bevolen, ordonneren ende bevelen mits desen, dat
