alle des Conincks van Spaegnien zeghelen, in dese voorsz. geunieerde Landen wesende, terstont nae de publicatie van desen, ghebrocht sullen moeten worden in handen van de Staten van elcke vande voorsz. landen respecktivelick, oft den ghenen, die daer toe by de selue Staten specialick sullen wesen gecommitteert ende gheauthoriseert, op pene van arbitrale correctie. Ordoneren ende bevelen daer en bouen, dat voortaene in egheenderhande munte vande voorsz. gheunieerde Landen sal gheslaghen worden den naem, titele ofte wapenen van den voorsz. Coninck van Spaegnien, maer alsulcken slach ende forme als gheordonneert sal worden tot eenen nieuwen gouden ende silueren penninck met sijne ghedeelten. Ordoneren ende bevelen insghelijcks den President ende andere Heeren vanden Secreten Raede, mitsgaders alle andere Cantselers, Presidenten ende Heeren van den Raeden provinciael ende alle die Presidenten oft eerste Rekenmeesters ende andere van allen de Rekencameren inde voorsz. Landen respectiue wesende, ende alle andere Officiers ende Justiciers, dat sy (als heur voortaene ontslaghen houdende van den eedt, die sy den Coninc van Spaegnien hebben respectivelick naer luyt heurer commissien gedaen) schuldich ende gehouden sullen wesen in handen vanden Staten s'lants, daer onder sy respectiue resorteren, oft heur speciale ghecommitteerde te doen eenen nieuwen eedt, daer mede sy ons sweeren ghetrouwicheyt teghens den Coninck van Spaegnien ende allen zijne aenhanghers, al naervolghende het formulair, daer op byde Generale Staten gheraempt. Ende sal men de voorsz. Raeden, Justiciers ende Officiers, gheseten onder de Landen (met de Hoocheydt vanden Hertogh van Anjou gecontracteert hebbende van onsent wegen) gheuen acte van continuatie in hunne Officien, ende dat by maniere van prouisie, totter aencompste toe van sijne voorsz. Hoogheyt, in plaetse van nieuwe commissien, inhoudende cassatie van heure voorgaende: Ende voorsz. Raeden, Justiciers ende Officiers, gheseten inden landen met sijne voorseyde Hoogheyt niet ghecontracteert hebbende, nieuwe commissien onder onsen naem ende zeghele: t'en ware nochtans dat d'impetranten van heure voorsz. eerste commissien wedersproken ende achterhaelt werden van contraventie der previlegien des Landts, onbehoorlickheyt oft ander diergelijcke saecken. Ontbieden voorts den President ende luyden vanden Secreten Raede, Cancelier vanden Hertoghdomme van Brabant, mitsgaders den Cantseler vanden Furstendomme Gelre ende Graeffschap Zutphen, Sjabloon:Sic, President ende luyden van den Raede in Hollant, Rentmeesteren oft de Hooghe Officieren van Beoist- ende Bewesterschelt van Zeelant, Pesident ende Raede in Vrieslandt, den Schoutet van Mechelen, President ende luyden van den Raede van Utrecht, ende allen anderen Justicieren ende Officieren wien dat aengaen mach, heuren stedehouderen ende eenen yeghelicken van henlieden besondere soo hem toebehooren sal, dat sy dese onse ordonnantie condighen ende uutroepen ouer alle den bedrijue van heure Jurisdictie ende daermen is gewoonlick publicatie ende uutroepinge te doene, sodat niemant des cause van ignorantie pretenderen en mach: Ende de selue ordonnantie doen onderhouden ende achtervolghen onverbrekelick, ende sonder infractie, daertoe rigoreuselick bedwinghende die overtreders inder manieren voorsz. sonder verdrach oft dissimulatie: want wy tot welvaren vanden Lande also
