onder 't decksel van heuren raet van doen te hebben, en te willen employeren in den dienst van den lande, uut last van den Coninck vriendelick ontboden: die hem ghehoor ghegheven hebben doen vanghen, teghens de previlegien uut Brabant, daerse ghevanghen waren, ghevoert, voor hem seluen (niet wesende heuren competenten rechter) doen betichten, ten lesten, sonder hen volkomelick te hooren, ter doot veroordeelt, ende openbaerlick en schandelick doen dooden: D'andere, beter kennisse vande gheveynstheyt der Spaegnaerden hebbende, hun uuten Lande houdende, vercleert verbeurt te hebben lijf en goet, voor sulcks hun goet aenveerdt ende gheconfisqueert, omdat de voorsz. arme inghesetene hun niet en souden, t'ware met hare stercten oft Princen die heure vryheyt souden moghen voorstaen, connen oft mogen teghens 't Paus geweld behelpen: Behaluens noch ontallicke andere Edelmans ende treffelicke Borghers, die hy soo om den hals ghebrocht als verjaeght heeft, om henne goeden te confisqueren. De reste van de goede ingesetene, bouen den ouerlast die sy in heur wijfs, kinderen en goeden leden, deur gemeyne Spaensche soldaten t'heuren huyse in garnisoen liggende, travaillerende met sovele diuersche schattinge, so mits heur bedwingende tot gheldinghe tot de bouwinghe van de nieuwe Casteelen ende forticicatie van de Steden tot heure eyghen verdruckinghe, als met opbrenghen van honderste, twintichste ende thiende penninghen, tot betalinghe vanden Crijghslieden, so by hen mede ghebracht, als die hy hier te Lande oplichte, om t'employeren tegens heur mede Lantsaten en de gene die het Lants vrijheyt met perijckel van heuren lijue aventuerden voor te staene, op dat de voorsz. ondersaten verarmt wesende, egeen middel ter werelt en soude ouerblijuen om zijn voornemen te beletten ende d'instrucktie, hem in Spaegnien gegeven, van het lant te tracteren als van nieuws geconquesteert, te beter te volbrenghen. Tot welcken eynde hy oock begonst heeft in de principale plaetsen d'ordre van Justitie nae de maniere van Spaegnien (dierecktelick teghens de previlegien vanden Lande) te veranderen, nieuwe Raden te stellen ende ten lesten wesende buyten alle vreese, soo hem dochte, eenen thienden penninck fortselick willen oprechten op de coopmanschappen ende handtwercken, tot gantsche bederffenisse vanden Lande, gheheelick op de voorsz. coopmanschap ende handtwercken staende, niet thegenstaende menichvuldighe remonstrantien, by elck landt in 't particulier, en oock by allegader in 't generael hem ter contrarien ghedaen: t'welck hy oock met ghewelt soude volbracht hebben, t'en ware geweest dat deur toedoen van mijnen heere den Prince van Orangien ende diuersche Edelmans ende andere goede ingheborene, by den voorsz. Hertogh van Alue uuten Lande gebannen, sijne Vorst. G. volgende en meest in haren dienst wesende, ende andere inghesetene wel gheaffectioneerde tot de vrijheyt van het voorsz. Vaderlant, Hollandt ende Zeelandt corts daer naer niet meest en hadde hem afghevallen ende hun begheuen onder de bescherminghe vanden voorsz. heere Prince, tegens dewelcke twee landen den voorsz. Hertoge van Alue duerende sijn gouvernement, ende daer naer den groten Commandeur (die naer den voorsz. Hertogh van Alue, niet om te verbeteren, maer om den seluen voet van tyrannie by bedecter middelen te vervolgen, den voorsz. Coninck van Spaegnien hier te lande gheschickt hadde) hebben d'andere landen, die sy met heure garnisoenen ende opgerechte Casteelen hielden in de
