uutstel van daerinne in tijdts te remedieren so den noot uut heyschte, alreede onder de gemeynte meest in alle de Landen begonst waren hen t'openbaren) heeft deur opruyen van den voorsz. Spaenschen Raedt, de persoonen de voorsz. remonstrantie ghedaen hebbende, doen verclaren rebel ende schuldig van het crym van Lesæ Majestatis ende alsoo strafbaer in lijf ende goet: hebbende daer en bouen de voorsz. Heeren Ghesanten namaels (meynende dese voorsz. Landen deur 't geweldt vanden Hertogh van Alue gheheelick ghebrocht te hebben onder sijn subjectie ende tyrannie) teghens alle gemeyne rechten, ooc onder de wreetste ende tyrannichste Princen altijt ouverbrekelick onderhouden, doen vanghen, dooden ende heure goeden confisqueren. Ende al wast alsoo dat meest de beroerte in dese voorsz. Landen deur toedoen van de voorsz. Regente ende heure adherenten in 't voorsz. jaer 1566 opghestaen, was gheslist, en veele die de vryheyt des Lants voorstonden, verjaeght, ende d'andere verdruct ende t'onder ghebrocht, soo dat den Coninck egheen oorsake ter werelt meer en hadde, om de voorsz. Landen met gewelt ende wapenen t'overvallen: nochtans om sulcken oorsake die den voorseyden Spaenschen Raet langhen tijdt ghesocht ende verwacht hadde (so opentlick de opgehouden ende gheintercipieerde brieven van den Ambassadeur van Spaegnien, Alana, in Vrankrijck wesende, aen de Herthoginne van Parma, doen ter tijdt gheschreven, dat uutwijsden) om te niete te mogen doen alle des landts privilegien, dat nae heuren wille by Spaegnaerden tyrannichlick te mogen gouverneren, als de Indien en nieuwe gheconquesteerde Landen, heeft deur ingheuen ende raedt van deselve Spaegnaerden (thoonende de cleyne affectie die hy zijnen goeden ondersaten was toedraghende, contrarie van 't gene hy heur, als heur Prince, beschermer ende goet herder schuldich was te doen) nae dese Landen, om de selue t'ouervallen, geschickt met groote heyrcracht den Hertogh van Alva, vermaert van strafheyt ende crudeliteyt, een vande principale vyanden vande selue landen, verselschapt, om als Raden neffens hem te wesen, met persoonen van gelijcke natuere ende humeuren. Ende al wast so dat hy hier inde Landen sonder slach oft stoot is ghecomen, ende met alle reuerentie ende eere is ontfanghen va de arme inghesetene, die niet en verwachten dan alle goedertierenheyt ende clementie, ghelijck den Coninck hen dickwils met zijne brieven gheveynsdelick hadde toegheseyt: Jae dat hy selfs van meyninghe was te comen in persoone, om in als tot ghenoeghe van eenen yeghelicken ordre te stellen: hebbende oock ten tijden van het vertreck van den Hertoghe van Alve nae dese Landen een vlote van schepen in Spaegnien, om hem te voeren, ende een in Zeelant om hem teghens te comen, tot grooten excessiuen coste van den lande doen toe-reeden, om zijne voorsz. ondersaten t'abuseren, ende te beter in 't net te brengen: Heeft niettemin den voorsz. Hertoghe van Alue terstont na zijn comste, wesende een vreemdelinck, ende niet van den bloede van den voorsz. Coninc, verclaert ghehadt commissie van den Coninck te hebben van opperste Capiteyn, ende corts daer naer van Gouverneur generael van den Lande, teghens de privilegien ende oude hercomen desselfs. Ende openbarende ghenoegh sijn voornemen, heeft terstont de principale Steden ende Sloten met volcke beset, Casteelen ende Sterckten inde principaelste ende machtichste Steden, om die te houden in subjectie, opgherecht: de principaelste Heeren,
