Nieuwe Tijdinghen/1620/27 februari
| ← 15 februari 1620 | Verhael vanden grooten slach in Duytslandt
[Nieuwe Tijdinghen], Boekje C, [donderdag] 27 februari 1620 |
13 maart 1620 [1] → |
Verhael vanden grooten ſlach in Duytſlandt,
van Bucquoy, wederom een groote Victorie heeft ghecreghen ende vande Boheemsche gheslagen heeft duysent vijf hondert Peerden, vijf Cornetten ghenomen ende twee Vendelen, ende den oppersten Luytenandt vanden Vyandt, vanden Graeff de La Tour ghevanghen ghenomen.
T’Hantwerpen, By Abraham Verhoeven, inde
gulde Sonne. Den 27. Februarij.
C.
Wt Venetien den 7. Februarij 1620.
TOt Mylanen wordt wederom vande Staten vande Lande by een ghebrocht de somme van neghen hondert duysent Croonen, om die omligghende Soldaten alles te betalen, ende tot Mylanen wort de Trommel gheslaghen om noch twee Regimenten voedtvolckx aen te nemen.
Dese Seigneurie en weet niet wat dencken, men soo veel volckx ouer al op neempt, hier zijn xx. Barchen met Italiaensche Soldaten, en Hollandtsche te Lande waerrin, nae Padua, Vicenza ende andere plaetsen, de Cappiteynen tracteren met dese Seigneurie ende ende en willen met xxxiiij. pondt ter Maendt voor elcken Soldaet niet te vreden wesen.
Schrijuen van Lisbona in Portugael.
Van Lisbona heeftmen, als dat in Oost-Indien [ 4 ]in de Provintie Guzaim, niet verre van Goa, door eene groote Aertbevinghe twee Steden met allen de Inwoonderen ten gronde vergaen zijn, ende wederom in Peru oock wel vierhondert menschen also verdoruen sijn.
Met Brieven van Madril 5. Februarij.
GOede vriendt t’sedert mijn leste schrijvens, is dese, dat te verwonderen is de menichte van t’gheldt hier is, desen Post draecht wederom noch eens hondert duysent Duccaten aenden Grave van Onnate, om te repareren het secours dat van Vlaenderen ende Italien ghegaen is. Vande reste en zijn de ordonnantien noch niet gheteeckent, door oorsaecke vande sieckte van sijne Catholijcke Mayesteydt, ende men weet noch niet oft van Italien volck marcheren sal naer Bohemen oft naer Neerlandt, want zijne Majesteydt is gheresolveert soo men vermeynt, eenen grooten Legher te maecken, (Extraordinaris) in Neerlandt, ende dat tot dispositie van haere Doorluchtighe Hoocheden de Eertsz-Hertoghen Albertus ende Isabella, Ende oouen die noch eenen in Bohrmen, ende tot onderhoudt van dese twee Leghers is gheresolveerdt te seynden dry Millioenen Duccaten van Italien, tot welcke Contributie gheeft eenen coopman van Mylanen vijf hondert duysent Duccaten, ende t’sel[ 5 ]ue Hertochdom dry honderdt Duysendt Duccaten, Napels, Sicilia ende Sardinia mette Contributie ende vercoopen van sommighe goederen ende vervallen Leen-ghoederen, twee Millioenen ende twee hundert duysendt Duccaten. Sijne Mayesteydt heeft gheheyscht aent Coninckrijck van Castillien hem te willen leenen een Millioen vande 18. mannen hem gheconsenteert voor vijf Jaeren, d’welck gheweyghert hebben, maer men verhoopt dat repliquerende t’selue noch doen sullen, d welck tat groot proffijt strecken soude, van sijne Heylicheydt verwachtmen oock groot secours voor den Keyser.
Den Hertoch van Savoyen presenteert den Keyser te dienen met thien duysendt voedeknechten ende twee duysent Peerden, ende selue in persoone te marcheren.
Van Hollandt sijn seker Tijdinghen dat den Ambassadeur van Enghelandt selue heeft gheheyscht aende Heeren Staten datse souden seynden het oudt Enghels Regiment Voedt-volck aenden Pfaltz-Graeff naer Heydelberch, ende dat hyse crieren sal met zijnen koninck, dat hy soo veel ander volck van Enghelant seynden sal tot vervullinghe van t’voorschreven Regiment.
Met Brieuen van Parijs xv. Februarij.
Men hondt hier voorseker dat het secours d’welc [ 6 ]den Coninc belooft heeft aen zijne Keyserlijcke Majesteyt van xij. Duysent voetvolck ende dry Duysent Peerden, alreede orden ghegheven is, de plaetsen te vervullen vande oude Regimenten ende de andere die noch op de been zijn, t’selue doetmen oock met allen de Compagnien Peerdevolck, Alsoo dat dien Legher sal al ghereet wesen d’eynde van dese maent om te moghen Marcheren, ghelijck den koninck beloofde ouer twee daghen, aen de Ambassadeurs van Spagnien ende Neerlant, inde Audientie diese van zijne Mayesteyt hadden dat stuck aengaende. Den Hertoch van Guise aenghesien pretendeert ende desireert, sal wesen Generael, al ist dat den Hertoch van Nevers ende Vendosme t’selue oock seer pretenderen.
Wt den Legher van Duytslandt, met eenen Extraordinaris Courier ghearriveert den xxiij. Februarij 1620.
Voorder soo verstaetmen ende dat sekerlijck met eenen Extraordinaris Post vanden Grave van Busquoy, aen zijn Doorluchtighe Hoocheyt Albertus, die voor Tijdinghe mede brenght datter eenen Treves is ghemaeckt met de Hongheren ende Bethlin Gabor Prince van Transilvanien, tot op S. Michiels dach toe naestcomende. Ende dat den Grave van Bucquoy gheslaghen heeft duysent vijf hon[ 7 ]dert peerden vande Bohemen, ende vijf Cornetten ghenomen met twee Vendelen. Ende den Teniente Generael oft Luytenant vanden Graeff de La Tour is ghevanghen ghenomen, Ende ooc warender ghecomen 3500. peerden vanden koninc van Polen voor zijne Keyserlijcke Mayesteyt, die door Slesia comende oock alsoo grooten quantiteyt geslaghen hebben van den Vyandt, ende vier oft vijf Vendelen ghenomen, Godt sy ghelooft vande Victorie.
Wt Weenen in oostenrijck 5. Februarij.
Men houdt voorseker dat den Vrede tusschen die van Hungharijen met den Transilvaen Bethlin Gabor ghesloten is, waer ouer hy wederom terugghe treckt, met zijn volck, onse Heeren Commissarissen verwachtmen hier daghelijckx van Presburg waer mede men verwacht de conditien daer besloten zijn, daer een yeghelijck seer naer verlanght.
Men verwacht hier daghelijckx oock de Ghesanten vanden Lande op der Ensz, de welcke met de Keyserlijcke Mayesteyt willen accorderen, soo datmen verhoopt de passagien hier ontrendt vry sullen wesen.
Dat Keyserlijcke volck leyt om Neuwstadt, S. Polten, ende hier rontsomme Weenen, die Boeren klaghen seer, want sy niet en comen om de Boeren Rijck te maken. [ 8 ]
Alsoo die Boheemsche ende Moravische vernomen hebben datmen wederom Brugghen ouer die Thonauw leyt, om ons volck metter haest ende gewelt ouer te setten, soo versterckt hem den Vyandt tot Wolckersdorff, ende Vlrichskirchen dry mijlen van hier, ons volck vergaderen wederom, om een Entreprise te doen, waer henen is onwetens.
Men heeft hier wederom een partije volcx te voet ende te peerde by een, ende met dat nieuwe volck datter noch alle daghe compt, soo ismen besich om met eenen anderen stercken Legher in Bohemen te marcheren, dit is t’principaelste datter nv gheschiedt is.
Den Leser sal breeder bescheedt sien ende lesen in de Nieuwe landt-Caerte vanden legher in Bohemen, hoe de leghers teghen malcanderen ligghen, ende innemen der steden, met de Bataillien, ende de Passagien van het incomen int koninck-rijc van Bohemen, de welcke men te coope sal vinden t’Hantwerpen, By Abraham Verhoeuen, op de lombaerde Veste inde gulde Sonne.