consequentelicken tot bederffenisse van Gasthuysen, Heiligegeestarmen, Wees ende Leproeshuijsen ende andere miserablen binnen den zelven Haege staende ende onthoudende, als opte huysen aldaer gerent ende gehypoteecqueert zijnde tot groote merckelicke sommen jaerlicx, met meer andere redenen van beswaernissen, zoe wel bij monde als in de voorsz. scriftelicke remonstrantie verhaelt, versocht hebben ’t voorsegde Bosch ende Warande met eenige gerede penningen te moegen redimeren, doende tot dien eijnde zeeckere presentatie: Soe est dat Zijne Excellencie en de Staeten voorschreven op alles goet regardt genoemen ende rypelicken gelet hebbende, zoewel ’t gundt tot vorderinge der voorsz. gemeene Saecke, als tot preservatie van de voorsz. Vlecke van den Haege metten gevolgen van dien soude moegen strecken, bewegen wesende tot der voorsz. thoenders ernstelicke versouck ende beden, metten selven Suppoesten ende Magistraet van den Haege geaccordeert hebben, ende accorderen mits desen, dat mits bij den voorsz. thoenders, in den eersten den voorsz. staeten voer de redemptie van ’t voorsz. Bosch ende Warande remitterende ende quytscheldende gelyck zyluyden verclaeren te remitteren ende quytschelden mitsdesen, de Clocken uuyten Haege bij den voorsz. Staeten doen haelen, bedraegende ontrent ter somme van vijftien-hondert Carolus guldens, zonder daervoeren tot eeniger tijdt, den voorsz. Staten yet te mogen eysschen, ende voorts belovende, gelijck oeck die voorsz. Verthoenders bij desen beloven dat de leeninge van penningen gedaen in handen van meester Heijndrick Meyster in den jaere LXXII lestleden tot behouve des gemeen Lants, blijven zal in sulcken staete ende surcheantie, als die jegenwoordelicken wordt gehouden sonder dat bij dengheenen die in den voorsegde jaere eenige penningen als voeren sullen hebben geleent staende desen oerloeghe ende troublen ’t voorsz.
