3
Wt Prage den 1. April 1620.
OVer eenighe daghen, soo hebben de onse met accoort Retz in ghenomen, ende daer in ghevonden 1400. vaten Wijn, ende andere dingen van importantien, het garnisoen van 500. Mannen heeft den Heer Generael met sack ende pack, ende volle gheweyr, laten uyt trecken, ende tot by Krems doen convoyeren.
Den Grave van Hohenlo is eer-gisteren uyten Legher alhier ghecomen, ende heeft terstont tegens den Generalen Lant-Hof-Meester, den Ontfanger Generael van de Ongelden, ende andere Lants Officieren straffelick ghesproken, om dat men in soo langhen tijt gheen gheldt voor de Soldaten en heeft geschickt, hy heeft oock op gisteren by den Coninck audientie ghehadt, ende hem over de lancksame ende traghe betalinghe (waer door het Volck heel onwilligh wordt) seer beclaecht.
