5
ontrent ligghen. Voorts soo hebben de Hungersche ende Moravische ettelijcke duysendt mannen op de passagie achter Olmitz ghesonden, van ghelijcken hebben die van Slesien ooc ghedaen, alsoo dat die Cosagghen swaerlijck sullen connen wt Polen comen.
De Staten van t’Landt Onder d’Ense zijn nv tot Ratz by malcanderen, ende hebben eenen Ambassadeur herwaerts gesonden, aen zijne Keyserlijcke Majesteyt, ende om prolongatie vande Huldinge doen bidden, het welcke hun ghegunt is tot tegen den 8. Junij, daer en tusschen salmen oock sien wat op den Hungherschen Landt-dach sal passeren.
Den ouersten Luytenant Carpezan vande rebellen, zidt noch tot Gravenwerth ghevanghen, ende tot Crembs zijn sommighe Borghers ghevanghen om zijnen t’wille, om datse met hem eenighe Correspondentie souden ghehadt hebben om de stadt aen den Vyant ouer te leueren.
Dat Boheemsche krijschvolck compt hoe langer hoe naerder herwaerts aen, soomen hier verstaet ligghen sy van Ratz tot by Stockerau, ende verthoonen hun dicwils op ghene sijde vande Brugghe, ende hebben deser daghen seer sterck te voet ende te peerde, tot aende Brugghe geweest, daer tegen beschanst hem den Grave van Bucquoy seer sterck.
