6
sal voeren, men verstaet hier van 52. Tonnen gouts in Baren Ghelde soo Goudt als Silvere Munte, ende noch wel twee hondert duysent Duccaten in Juweelen, ende andere Fraeyicheydt, hy heeft soo veel Ghelts by hem om den gheheelen Legher ix maenden te betalen, d’welck hier in Duytslandt een groote verwonderinghe maeckt.
De Protestanten oft Rebellen vande Keyserlijcke Majesteyt hebben een Ligue ghemaeckt, ende brenghen veel volckx, soo te voedt als te peerde te samen maer men verstaedt niet datter veel Ghelts volght oft yewers eenighe partijen gesloten worden om de Soldaten te betalen, waer ouer eene partije van den Boheemschen Legher ghemuytineert is, door faute van betalinghe, watter voorders af comen sal wildt ons den tijdt leeren.
Wt Italien zijn ghecomen 84. Muylen gheladen met Gheldt alles met Spaensche Matten gheladen d’welck is gheconvoyeert gheworden van de nieuwe Italianen ende is ouer eenighe daghen ghearriveert in Lutsenborch.
Den Hertoch van Beyeren maeckt hier in Oostenrijck groote vreese aen de Rebellen, soo datse hier in Oostenrijck (Godt loff) meest alles tot ghehoorsaemheyt vande Keyserlijcke Majesteydt ghebrocht zijn, ende willen den Keyser Huldighen.
