5
alreede met een helligher stemme voor Coninck van Hongrijen ghedeclareert, ende sal de Oorloghe met macht ghecontinueert worden, alsoo hy Betlehem Gabor alreede 18000. mannen naer Oostenrijc ende Bemen heeft geschickt, ende noch 50000. daer onder 1500. vrije Heyducken zijn, die in eenighe plaetsen hierom verdeylt ligghen, mette welcke hy Betlehem de naestcommende weke naer Presborch wilt trecken, ende soomen seyt hem wilt laten Croonen, ist moghelijck, den welcken noch daghelijcx doet volc lichten, gheeft aen eenen Ruyter 2. ende aen een Voetknecht 1. Daelder ter maent, Dies sullen zy de vrije buyten voor hen behouden, daeromme moghen die vande Steyrmarckt ende Oostenrijck wel toesien.
VVt Praghe den 4. September.
Den Beyerschen Courier ofte Post, is weder met ghevinde der Keyserlijcker Patenten, ende die daer by gheslotene Ghedruckte Deductie met dese Resolutie weder affgheveerdicht ende gedepescheert, als namentlijck dat zijn versoeck geensints en kan achtervolght worden, ende indien hy yet vyantlijcken wilt attenteren, soo en salder aende behoorlijcke middelen van defensien gheen ghebreck zijn, want de Bemen zy zijn gheresolueert alle haere goederen, have, ende Erue, Goet ende Bloedt met malcanderen daer voor te stellen, ende de wtcompste Godt den
