4
nv heele Oostenrijck is onder den Keyser, ende heeft afstant gedaen van de Vnie, met die Beemsche ouer ettelijcke Jaren aenghegaen.
Den Hertoghe van Beyeren, met meer dan 20. duysent wtghelesen Soldaten, ende den Grave van Bucquoy, met meer dan 18. duysent mannen, trecken vast naer Praghe om die stadt te belegheren.Den Hertoghe van Saxen, met 15. oft 16. duysent mannen is ghevallen in Lusatia, ende heeft in genomen Billua ende andere steden, ende compt oock naer Praghe.
Den Hertoghe van Beyeren hadde noch ghelaten in sijn Landt 7. duysent mannen, de welcke hy heeft doen marcheren naer Budwys: alwaer sy sullen vinden Don Balthaſar de Marrada, Don Guilielmo Verdugo, met het Regiment van Waelen, wel ouer een Jaer is ghecomen wt Napels ende meer andere Troupen.
Men seyt alhier dat den Palsgraue seluer wilt trecken te velde, ende dat hy opneempt den thienden Boer ende den achtsten Borgher: maer het is quaet ter Jacht te gaen met onghewillighe honden, ende den Boeren krijch en is nimmermeer goet, ghelijckmen nv siet in Palslandt, daer sy wech loopen, eer sy de Trommelen oft Trompetten van den Marquis Spinola hooren slaen.
