17.
ghereetschap, ende toerustinghe van ontsettinghe? Is het teghens den Brandenburgher haer eyghen Ouersten, oft teghens den Sacx soo stercken Naeghebuer, oft teghens alle beyde? Waerom stelt ghy V. L. teghens het huys van Brandenburch met v verbonden, en t’ghene ghy soo veel schuldich zijt? Ick weet wat voor antwoorde ghy gheuen sult, te weten dat teghens yder Prince, voor yder Stadts Wel-uaren ghereet zijt d’Oorloghe aen te nemen, mitsdien ghy niet de geschillen, ende t’recht vande Oorlogen, maer alleen de menichte aen en siet.
De Handtsche steden zijn dit verdrach oock ingetreden, door gheen ander reden, dan om dat den D’eenemercken, Sacxen, ende andere omligghende v souden vreesen, ende de steden haer versterckende, de naeste Princen mochten krencken, ende beschadighen.
Dit is al oudt. Laet ons comen tot onse tijden. Waerom haet ghy den Frans-man hem alle leet bethoonende, ende ondercruypt den Engels-man met alle teeckenen van vrientschappe? De reden is om dat ghy aen Vranckrijck luttel kunt ghedoen, de croone van Enghelandt steunt op een man-oir, hierom verhoopt ghy dat een deel lichtelijck op V.L. sal versteruen, hoe wel dit betrouwen veel vermindert is, van datmen van het Spaensch Houwelijck heeft begonst te spreecken, hierom spandt ghy te vaster mette Handtsche steden, ende Venetianen. Oldenbarneuelt een Vriendt zijnde van Vranckrijck, deur versoeck van Bretangien om den hals brenghende.
Is by aldien dat dese saecke een yder niet ghenoech bekendt en is, der Bohemen Rebellie nochtans sal dit claerlijck voor den dach brenghen, want bouen alle Volchen die onder Coninghen leefden, waeren zy de vrijste, ende siet sonder recht oft reden met onbillijcke, ende onghehoorde wreetheyt haer eyghen Magistraet, Edele ende Prijsbare mannen werpen zy te vensteren wt, voldoende ongoddelijc de bloet-giericheyt der ghemeynten. Hier senden terstont de Hollanders Ghesanten, belouen alle hulpe, verwecken andere Princen, ende om een Republijcke in te stellen kiesen Regierders, die met volle auctoriteyt regieren mochten. De Bemersche helpen andere Princen, maer oft noch ionck van iaeren, oft van verstande, t’welck beter is te
