23.
wesen, daerse t’huys die in veel minder punckten verscheyden zijn, nochtans soo vyandelijck, iae tyrannelijck vervolghen? T’is haer dan alleen ghedaen om alle Prinsdommen uyt te roeyen, ende Jan rap met zijn maet op de roode kussens te benghen. Ende om dat de Evanghelische Princen dit niedt bemercken, maer tot haer naerdeel gherustelijck op slaepen souden, versieren veel decmantels als de Tyrannie des Paus van Roomen, vanden Coninck van Spangien, vande Inquisitie. Religions vrijheyt, hoope tot de Bisdommen te gheraecken, en dierghelijcke, maer eyghentlijck, om datse de Princen vermoeyt ende verswackt van Oorloghen tot haeren wille met ghewelt souden moghen bedwinghen, ende tegens haeren banck nieuwe wetten oplegghen.
Hierom ontwaeckt v o Coninghen! o Princen! staet kloeckelijck ter weere om v wetten en weerdicheyt voor te staen, om v naerghebueren Coninghen en Princen met goet ende bloet te beschermen, t’ghene verstout te doen den Hollander, kan verstouten den Enghelsman, t’ghene den Bohemer nu doet, kan den Sacx heden oft morghen bestaen te doen, heur en sullen noch occasie, noch Meutmaeckers ghebreecken.
Die de wederspannighe beschermt, leert zijn Ondersaeten wederspannich wesen.
Die de Wt-heemsche, lasterende de Wetten ende Polityen, mildelijck aenhoort, baent den wech tot inlandtsche oproeringhen. Ist dat ghy helpende de Rebellen, de Coningen bederft, zy ghewonnen hebbende sullen uws Ondersaten teghens v de wapenen doen aennemen.
