7
naeme der Hongheren hulpe heeft begheerdt en weetmen noch niet sekerlijc t’adviseren, eenighe segghen, dat hy geene hulpe en heeft gheeyscht, midts dat de Landen machtich genoech zijn tegens hare Keyserlijcke Majesteyt, maer is seker dat hy thien duysent Janitzeren, ende twintich duysendt Spaihem Grenitzers heeft gheeyscht, om voor d’eerste int Landt te brenghen.
Men gheeft nochtans met woorden te verstaen, datmen den Peys met haere Keyserlijcke Majesteyt vastelijck wilt onderhouden, maer wantmen tegens de Capitulatien mette Rebellen tracteert, ende dat de presentatien soo groot zijn, soo ist meer te presumeren, dat de turcken. (Indient alreede niet en is gheschiedt) mette Rebellen van haere Keyserlijcke Majesteyt een verbondt sullen maecken, daer toe eenighe Ambassadeurs van Natien die zijne Keyserlijcke Majesteyt zijn haetende, ghetrouwelijck helpen.
Men verstaet ooc, datmen alreede op de Frontieren heeft gheordonneert ende bevolen, dat het volck soude t’samen comen, ende hen ghereet houden, gelijck ooc den Afghezetten Oppersten Vezier Chiaia openbaerlijck vermelt, dat sy niet min en connen doen, als ooc te Armeren, tot versekeringe der Landen des Soudaens.
