Wt Venetien den 17. Februarij 1621.
NAer de verkiesinghe vanden nieuwen Paus, (voor desen vermelt) zijn de 2. Cardinalen Aldobrandino ende Acquino deser werelt overleden, ende dewijle Aldobrandino wel de principaelste geweest heeft dat dese tot Paus gecoren is, soo heeft den Paus tot danckbaerheyt des Cardinaels Aldobrandinos Neve Erts-Bisschop van Ravenne ghemaeckt, met een pensioen van vijfthien duysent croonen jaerlijcx. Den Cardinael van Savoyen vernemende int reysen naer Roomen datter een nieuwen Paus ghecre-eert was, is weder te rugghe ghetrocken.
Wt Weenen den 24. Februarij.
Van weghen die Honghersche tractatie, is die stilstant met hen op 12. daghen gheprolongeert, doch gelt maer alleene aen dese zijde tot op Presburgh ende Turna, aen d’ander zijde streupen sy daghelijcks, ende voeren die luyden ghevancklijck wech, hebben oock den Merck Wolckersdorp gheplondert ende afghebrandt, waer over men inde 3000. man te peerde ende te voete heen over ghesonden heeft, t’selve te keeren, dewelcke die Hongaren (overmits het ys haest breken mochte) niet hebben verwacht, maer sich weder heen over tot den Wittenbergh ghesalveert.
Die 600. Cosacquen die verleden weke haren aftoch van hier nae Polen hebben ghenomen, sijn inder nacht over de Donau ghevoert, alsoo dat die Hongaren dewelcke op hun hadden ghewacht deselve niet hebben aenghetroffen, dan andere melden dat sy daer nae tusschen die Moravische ende Poolsche Frontieren van de Hongaren meest alle zijn gheslaghen, behalven eenige weynich diet ontloopen zijn, hebbende eene groote buyte van hun becomen.
Soo comt oock tijdinghe dat de Budiani sich met den Hongaren ghesterckt ende tot Beckenveldt den Colaldo in zijn quartier overvallen, alle zijn volck neder ghehouwen, sulcks dat Colaldo sich selfs nauwelijck heeft ghesalveert.
Teghenwoordich wil men segghen dat die vredens tractatie mette Hongaren soo wijt becomen is, dat het nu alleen maer staet op Keyserlijcke Majesteyts generael pardoen, die resterende poincten waren meest alle gheaccordeert.
Bucquoys volck light noch mettet Winterleger aen de Marck ende verwacht aldaer ghelt ende ordonnantie, men seght dat Bucquoy selfs wil resigneren.
Hare Keyserlijcke Majesteyt hebben sich metten Hertogh in Beyeren door desselfs Heeren Ofgesanten sulcx vergheleecken, dat hare Vorstelijcke Doorluchticheyt van weghen hare alreede aenghewende Crijchs oncosten, die sich op twee ende twintich Tonnen Gouts bedraghen het Landt over der Ens pants-wijse sal inhouden, tot dat ander contentement volght, ofte die Chur-Palts, wanneer de selvevan Spinola inghenomen is, daer voor gheven, twelck die Over-Ensersche Standen vreemt voorcomt, ende wel allerley veranderinghe gheven mochte.
Tot Brin ende aen ettelijcke andere plaetsen in Moravien, heeft men die Evangelischen alreede die Kercken ghesloten, ende die Predicanten wech gheschaft, desghelijcx is in dit Landt in’t Stedeken Horn oock geschiet, ende mochten wel corts, soo wanneer het maer mette Hongaren claer is, meerder reformatie volghen, Soo is oock van’t Hof een Decreet uytghegaen ende ernstich bevolen, gheen ander als de Catholijcksche Religie toegedaen zijnde, in dienst ende officien te nemen.
Wt Prage den 25. dito.
Voorleden Saterdach heeft de Vorst van Lichtensteyn op Keyserlijcke bevel 7. Heeren ende Ridderlijcke persoonen, Item 21. vande Burghers ende den Raet, uyt alle drie Pragher-Steden, dewelcke sich meest alle voor desen by die Directie hebben gebruycken laten, in verseeckeringe laten nemen, Die Heeren ende Ridderlijcke persoonen heeftmen achter de Slot-kercke, daer het Burghgraven ampt ghehouden wort, die anderen opte Raedthuysen 3. 4. ende 5. by malcanderen in bewaringhe gheset, soo men verneemt, sullen die Heeren ende voornaemsten nae dese weecke op ettelijcke Conincklijcke Sloten als Birlits, Glaats ende dierghelijcke plaetsen, tot hare Keyserlijcke Majesteyts aenkomst, ghevoert ende bewaert worden.
Die jonghst ghemelde stucken diewelcke den Vorst van Beyeren alhier vanden Chur-Vorst Palts verovert heeft, ende voor eenighe daghen van hier wech ghevoert ende met 300. man gheconvoyeert zijn, sijn niet alleene tot Glata ghebrocht, maer oock den selven dach met ander volc dat van Munchem het gelt voor die Beyersche Soldaten ende over 500. duysent florijnen was, hadden gheconvoyeert, voorts nae Munchem ghevoert, die anderen zijn wederom te rugh mettet ghelt eergisteren avont alhier aenghecomen, alsoo dat niet volgt, gelijckmen voor desen uytgegeven heeft, dattet Mansveldtsche volck het Convoy gheslaghen ende de buyt ghecreghen souden hebben.
Van die Capiteynen ende Officieren verneemtmen, dat die Grave van Mansvelt ende met hem de Grave Albin van Slijck, sich nae de Palts souden begheven hebben om meer volck aen te nemen, dewijle hy sich niet over 3000. man sterck bevindt, waer teghens dat Beyersche volck sterck op hun aendringt ende sichseer stercken, ghelijck dan oock aen die plaetsen die Keur Saxsche hulpe aenghecomen is, ende Pilsen ende anderen plaetsen omcinghelt hebben.
Dese daghen hebben sich die ghedeputeerde Commissarissen van hier int Coninckrijck Bohemen begeven, om t’volck opt landt te ontwapenen.
Hertogh Maximiliaen in Beyeren heeft (naedien den Acht tegens de Churv. Palts tot Weenen is gepubliceert geweest) aen de Over Palts geschreven, ende aen hun begheert sich te verclaren of sy sich by sulcken beschapen saken in sijne bescherminghe begheerden te gheven, souden daer op geantwoort hebben, sy hadden een mael haren Heere gheswooren, den welcken sy met plicht ende Eedt verbonden waren, verhoopten dat deselve haer wel soude beschermen.
Vande Honghersche tractatie ist gheheel stil, niet teghenstaende dese daghen verscheyden schrijven van Weenen alhier aenghecomen zijn, ende gants niet daer van vermelden.
Wt Wels den 23. dito.
Wt dese quartieren heeftmen vijf Vaendels ende twee Cornet Beyersch volck in Bohemen tegens Wittingou ghevoert, twelck van Mansvelt seer sterck beset is, ende sonder groote macht weynich daer voor uyt te rechten sal zijn, laet sich noch wonderlick aensien, die Keyserlijcke Achts verclaringhe wert noch veel haets verwecken, ende op’t uytterste Turcsche hulpe veroorsaecken, Ende heeft men den sesten deses snachts in dese Landen een wonderlick teycken ghesien, namelick dat midden door die Mane een Cruys ghegaen is met een langhe ofhanghende steert, met drie Reghenboghen rontom.
Wt Inſbruck den 24. Februarij.
Eergisteren is de Erts-Hertoch Leopoldus alhier gekomen, deselve heeft vele Oversten by hem, de welcke morghen ettelijcke duysent man sullen volgen, sullen int Augsburger Bisdom geinquartiert worden, die selve sal die Beyer-vorst van weghen de Liga onder sich nemen, ende nu toekomende voor-jaer selfs te Velde trecken.
Wt Worms den 27. dito.
Dat Spinola maendach den 15. deses voor den
