Bundtners te rugh ende inde vlucht ghedreven met verlies van 42. man, die rest zijn met vlucht ghesalveert, dewelcke die Bundtners ettelijcke uyren lang naeghejaecht hebben, hebben daer na dat Lantvolck de Wapenen afghenomen ende de passagie belegt.
Die Spaengiaerts hebben op de brugh eenich vierwerck ghemaeckt, om de Bundtners daer op inde lucht te springhen laten, dan alsoo sy selfs onversichtlijcken mette Lonte omgegaen sijn, is het pulver aenghesteecken, ende zijn selfs vande hare inde 50. inde lucht ghevloghen, ende meestendeel doodt ghebleven.
Tot Beern soude de Overste van Erlach met 14. Vaendel tot assistentie van de Bundtners uyt trecken, met volle Commissie, waer hy den Pas beslooten vint sich met ghewelt deur te slaen, soo hebben die van Zuijrich het gheheele Landtschap ernstich bevelen laten sich ghereet te houden.
Den Erts-Hertog Leopold heeft met grooter ernst die vier Heerlichheyden om Veltkercken om heer op ontbieden laten, ende den derden man uytgheschoten, ende deselve in haest nae Meyenvelt ghesonden.
VVt Ambergh den 12. dito.
Voorleden Donderdach hoortmen hebben sich die in Ellenboghen overgheven moeten, nae dien dat die Beyerschen den selven dach den negensten deses, met stormen groote schade daer voor geleden hadden, sijnde vande belegghers daer nae met ses Stucken die van Pilsen daer henen ghebrocht zijn, soo sterck beschoten, dat die belegherden sich nergent opte Strate hebben derven sien laten, zijn alsoo eyntlick met Accoort, brandende Lonten, vlieghende Vaendels, Sack ende Pack afghetrocken, Die Graef van Mansvelt is met sijn ontset wat te laet ghecomen, ende alsoo wederom te rugh trecken moeten.
VVt Heylbrun den 13. dito.
Men tracteert alhier met de Oversten, de welcke tzedert in dienst vande Unie gheweest zijn, van weghen hare betalinghe, ende is dat Volck uytten Pals meestendeel uytghevoert, ende wert nu de Pals met sijn eyghen, mitsgaders Engelsch ende Staten volck, twelck sich daer inne tamelick sterck te Peerde ende te voete bevindt, onder het Commando van Horatio Veer, bewaert.
Den roep is datmen opte Collegiale vergaderinge tot Reghens-Burgh, den Hertoch in Beyeren den Chur-Vorstelijcken Hoet op setten wil, doch wil men den Pals Grave sijn Landt laten, sal misschien op een Rijcxdach uytloopen.
Den Stilstant inden Pals is van Spinola op thien daghen gheprolongeert, men meynt dat de prolongatie door den Coninck van Enghelandt, wel op een Maent by den Ertshertoghen Albert sal vercreghen worden.
VVtten Pals den 14. dito.
Maendach is de oude Marckgravinne van Baden overleden, Huyden is des jongen Graven volck tot Leutenburgh ende Neckerhuysen opghebroocken, dan hebben sich tot Swertzingen wederom by malcanderen ghevaecht, hebben by den Bisschop van Spyr quartier begheert, twelck hun afgheslaghen is, laten sich verluyden, dat zijt met ghewelt nemen willen. Soo treckt oock daghelijcx veel Crijchsvolck in de tsestich ende tseventich streck, nae Straesburgh, Die jonghe Marck-Grave is alreede afghedanckt, heeft anderhalve Tonne Gouts ontfanghen tot betalinghe van sijn Volck.
Men verstaet dat de Keyser ghesonden hadde aen de Conincklijcke Majesteyt van Denemarcken, om te verstaen, waer toe het sijne Majesteyt van Denemarcken ghemunt hadde, ende waerom hy op den Rijcxbodem met soo swaeren tocht hem in de Wapenen begaf, en dat syne Keyserlijcke Majesteyt den Heer Coninck alles goets toebetroude, als wesende sijn vriendt, dien hy noyt oorsaecke ghegheven hadde teghen het H. Rijck, oversulcx badt hy sijne Coninclijcke Majesteyt daer van te doen eenighe openinghe, waer op men verstaet dat sijne Conincklijcke Majesteyt soude gheantwoort hebben, dat hy sijn optocht aen sijne vrienden ende gheallieerde niet en hadde gheopenbaert ende derhalven oock voor dees tijdt sulcx niet doen conde[.]
Oock verstaetmen datter te Tours twaelf persoonen ghehanghen waren om dat zy den Hughenooten in hare Vrijheyt ende Godts-dienst moetwillichlijck hadden verhindert ende de ghemeente geplondert, ende voorts is de Magistraet opgheleyt (om dat zy de dertelheydt vant ghepeupel niet hadden gebreydelt) dat zy der Ghereformeerden Kercke wederom souden optimmeren ende alles herstellen ghelijck het te vooren gheweest is, tot contentement van die vande Religie, met sware peenen vanden Coninck.
Ghedruckt by Broer Jansz. out Corantier int Legher van sijn Princelijcke
Excellentie, woonende op de nieu-zijds-achter-Borchwal inde Silvere Can, by de Brouwerije vande Hoy-Bergh, den 22. Mey, 1621.
