[ 2 ] Tijdinghe uyt Polen melden, dat den Rijcx dach tot Warschau geeyndight was, maer dat aldaer weynich was besloten, overmits men in veel saecken niet en kosten over een komen: evenwel wasser een groote vreese over de seer groote en boven maten dappere toerustinge van den Grooten Turc, overmits zy verstaen hadden, datter rekeninge gemaeckt worde, dat de Grooten Heere selver in persoone met een over groote macht soude te velde trecken.
Daertegen den Coninck oock groote Krijghswervingen dede, en was besloten datmen tegen den Turc hondert vijftich duysent mannen inde wapenen houden soude, ende dat men by noot oock koopere munte tot eenighe milioenen toe ghebruycken soude. Andersints vreesden zy mede, of men wel uytgeeft dat het teghens Polen gemeynt zy, dat ondertusschen Hongarijen, Oostenrijck, Meeren, Slesien, etc. daer van niet vry sullen wesen, ten zy dat de Christen Potentaten sich met malcanderen verdragen, ende also te gelijcke den algemeenen vyant weeren mochten.
