Karel ende Elegast/Deel 4
< Karel ende Elegast/Deel 3 | Karel ende Elegast/Deel 4 | Karel ende Elegast/Deel 5 > |
---|
Bequaemgroepe: Karel ende Elegast
600
Dan sel ic deylen ende ghi sult kiesen
Dies achter gaet moet riesen
Elegast seide waer leit den scat.
Lieue gheselle segt mi dat
Ende in wat stede
605
Het mach daer sijn ic vare mede
Ic wils wesen vroet:
Eer ic v volghe eenen voet
Doen seide karel die edel man.
Ic selt v berechten dan
610
Die coninc heeft so groot een scat
Het mochten luttel deeren dat.
Vansinen scatte daer hi leghet
Als die coninc seghet.
Datti hem seluen stelen wille
615
Elegast en sweech niet stille
Hi seyde dat moet mi god verbieden[fol. 13r]
Si en leuen niet diet mi rieden
Dat ic den coninc dade scade
Al heeft hi mi bi quaden rade.
620
Mijn goet ghenomen ende verdreuen
Ic sel hem al mijn leuen
Goet vrient sijn na mijn macht.
In sijn scade en coem ic te nacht
Want hi is gerechtich heere
625
Dade ic hem anders dan eere
Ic mochs mi scamen voor gode
Men mochs mi gheraden node
[.]Ls dit die coninc verstoet
Was hi blide in sinen moet:
630
Dat hem elegast die dief
Goet gonste ende hadde lief.
Hi pensde mochti keeren.
Behouden sijnder eeren
Hi souden goets so vele geuen
635
Hi souder mit eeren sijn daech op leuen
Sonder stelen ende rouen
Des mocht men hem gelouen
Na dien gepense daer hi in was.
Vraechde elegaste das
640
Oft hien yewers wilde leyden
Daer si tgoet onder hem beyden:
Mochten beiaghen op dien nacht
Hi deder toe sijn beste cracht.
Gheerne ende sijn behindichede[fol. 13v]
645
Woude hi hem laten varen mede.
ELegast sede ia ic gerne
Men weet niet ghi segt in scerne
Theggericx van eggermonde
Daer moghen wi stelen sonder sonde
650
Die des conincs suster heeft.
Het is scade dat gi leeft
Hi heeft den menighen verraden
Ende ghebrocht in groter scaden
Ende ooc mede sinen heere
655
Soudi nemen lijf ende eere
Mocht na sinen wille gaen
Dat heb ic wel verstaen.
Nochtan houti vanden coninc
Herde menich scone dinc
660
Beyde borch ende leen
Al en haddi toeuerlaet anders geen
Het mochten luttel deeren
Dat wi vanden sinen teeren:
Daer selen wi varen ist v wille
665
Die coninc peynsde ende sweech al stille
Na dat daer ghescepen stoet
Dat daer ware stelen goet.
Al hadden sijn suster gheuangen
Si souden node laten hangeu
670
Dus droeghen si ouereen
Daer te varen onder hem tween
Te stelen eggerics scat.[fol. 14r]
Die coninc hem niet en vergat
Hi quamen ghereden op een velt
675
Op haer orssen wel ghestelt
Daer vonden si een ploech staen
Die coninc beette neder saen
Ende elegast reet voren
Daer si den wech hadden vercoren
680
Die coninc namt tcouter in die hant
Dat hi aen die ploech vant
Hi pensde in sinen moet
Dit is den ambocht goet
Die grauen wil in borghen
685
Hi moeter toe besorghen
Sulcke dinc als hem bedorste.
Doe sat hi op al sonder vorste.
Ende volchdde elegaste
Na met sporen vaste:
690
Die een luttel was voren
Verstaet so moechdi horen
Doen si quamen voor die veste
Die de scoonste was ende die beste
Die yewaert stoet opten rijn
695
Elegast sprac hier wil ic sijn
Nv siet seyti adelbrecht.
Wat dunct v ghedaen te recht
Ic wil wercken bi uwen rade.
Mi ware leet gheschiede v scade
700
Datmen mochte seggen dan[fol. 14v]
Het quam al bi desen man:
Die coninc antwoerde na dier talen
En quam noyt binnen der salen
Noch inden houe daer ic weet.
705
Het soude mi wesen ongereet
Soudicker nv binnen gaen
An v seluen moet al staen
Elegast seide tis mi lief
Sidi een behendich dief.
710
Dat sal ic cortelic verstaen
Laet ons een gat maken gaen
Inder muer ter goeder vre.
Daer wi moghen crupen dore
Dit loueden si beyde wel
715
Si bonden hoer orssen snel.
Ende ghingen ten muere sonder gheluyt
Elegast trec een yser vut
Daer hi den muer mit soude picken
Doe began die coninc te trecken
720
Tcouter voert vander ploech
Doe stont elegast ende loech
Ende vraechde waer hijt dede maken
Constic tsmeesters huus gheraken
Ic dede maken sulc een
725
Dus ghedaen en sach ic noyt gheen
Beseghen tot sulcken sticken:
Daermen mey doer soude picken
Die coninc sprac het mach wel sijn[fol. 15r]
Ic quam gheuaren opten rijn
730
Dies is leden die derde dach
Dat ic voer om mijn beiach
Daer moestic mijn yser laten
Het ontuiel mi opter straten
Daermen mi volchde achter
735
En dorste niet keeren door den lachter:
Dus was ic mijns yser aue
Ende dit nam ic bider mane
Daer ict vant aen een ploech
Elegast sprac het is goet genoech
740
Mogen wi daer te punte in geraken
Hier na doet een ander maken
Si lieten die tale si maecten tgat
Elegast voechdent bat
Dat hi daer toe dede sine leden.
745
Dant den conic karel dede
Al was hi groot ende sterc
Hi en conste niet sulc werc
Doen si tgat vander muere.
Hadden bracht al duere
750
Ende si daer in souden gaen
Elegast sprac ghi sult ontfaen.
Hier buten daer ic v sel brenghen
Hi en woudes niet ghehenghen
Dat die coninc binnen quame.
755
So sere ontsach hi hem der onuramen.
Hi en dochten geen behendich dief[fol. 15v]
Nochtan woudi leet ende lief
Met hem deylen sijn ghewin
Die coninc bleef buten elegast ginc in
760
Elegast conste behendichede.
Die hi proefde ter menigher stede
Die was minlic ende mate.
Hi trac een cruyt vut eenen vate
Ende deet binnen sinen monde
765
Die sulc een hadde hi verstonde.
Wat hanen craeyen ende honden bilen
Doen verstont hi ter wilen
An enen hane an enen hont.
Ende seide dat die coninc stont
770
Buten den houe in haer latijn
Elegast sprac hoe mach dit sijn
Soude die coninc sijn hier voren.
Ic duchte dat mi naket toren
Ic ben verraden na mijn ghedochte
775
Oft mi verleyt alfs gedrochte
[.]Legast ginc daer hi den coninc liet:
Ter stede daer hi van hem schiet
Ende seide hem wat hi hadde verstaen.
Hem en bedrogge sijn waen
780
Beyde aen hanen ende aen houden.
Diet in haer latijn vonden
Dat die coninc ware daer
Mer hi en wiste niet hoe naer
Doen seyde karel die edel man[fol. 16r]
785
Wie heuet v gheseit dan:
Wat soude die coninc hier doen
Soudi ghelouen an een hoen
Oft dat een hont bast
So en is v gheloue niet vast
790
Mi denct dat ghi mi saghen telt.
Waer toe ist goet dat ghi mi quelt
V gheloue en is niet vast
Nv hoort sprac elegast
Hi stac den coninc inden mont.
795
Een cruyt dat daer voor hem stont
Ende seyde nv suldi verstaen:
So ic te voren hebbe ghedaen.
Echter craeyde die hane ende sede
Also als hi te voren dede