Nieuwe Tijdinghen/1620/8 mei (2)
| ← 8 mei 1620 [1] | VVaerachtich verhael vanden grooten Slach, ende Uictorie verkreghen teghen de Rebellen van Bohemen, door den Generael Graeff van Bucquoy, gheschiedt op den Palmsondach smorghens ten 8. uren, waer dat vanden Vyant ouer de 1500. ghebleuen zijn, waer onder is geweest den meesten Eeldom van Praghe
[Nieuwe Tijdinghen], Boekje P, [vrijdag] 8 mei 1620 |
8 mei 1620 [3] → |
VVaerachtich verhael vanden grooten
Slach, ende Uictorie ver-
kreghen teghen de Rebellen van Bohemen, door den Generael Graeff van Bucquoy, gheschiedt op den Palmsondach smorghens ten 8. uren, waer dat vanden Vyant ouer de 1500. ghebleuen zijn, waer onder is geweest den meesten Eeldom van Praghe.
Nu eerst Ghedruckt den 8. Mey 1620.
_p_1_a_battle.jpg)
T’Hantwerpen, By Abraham Verhoeven, inde gulde Sonne. 1620.Met Gratie ende Previlegie.P
ALsoo onsen Leger hem noch bevint met sijn Excellentie den generael Graef van Bucquoy tot Langenlois, ende den vyandt van Bohemen, Moravien, ende Slesien ligghende in hun Quartier 8. mijlen van daer, soo heeft den Graeff van Bucquoy voor ghenomen een Entreprise te doen op eenighe Quartieren van den vyant, om die te betrappen, [ 4 ]ende is stillekens van Langenlois op ghetrocken des avonts den 11. April, met 2. duysent vyf hondert Ruyters, ende eenighe duysent voet knechten, waer by waren duysent Musquettiers, ende heeft den heelen nacht ghemarcheert, 8. mijlen verre, tot Sondaechs smorgens op den Palmen-Sondach schoon dach wesende ten 8. uren is ghecomen tot by Sitzendorff, daer den vyant lach met zijnen legher, hy meynden wat anders wt te rechten, maer en cost tot zijn vermeet niet wel ghecomen, nochtans en wilde hy niet weder keeren sonder yet wt te rechten, den Graeff van Bucquoy, hy stelden terstont in een Bossch niet verre van des vyants Quartier in Embuscade duysent Musquettiers, ende sont voor wt 3. Cornetten peerden van de Pollacquen of Cosacquen om t’velt t’ondecken, de welcke ghesien zijnde van den vyant zijn terstont vervolcht gheworden, ende de Cosacquen al schermutserende hebben de vlucht genomen, ende zijn geweken tot by de Embuscade.
Sijn Excellence siende den vyandt furieuselijck aencomen, gaf zijne Cappiteynen en Soldaten coragie, segghende met den blooten hoofde, Meſſieurs voicy l’heure qu’il nous faut gaigné l’honneur, viure & mourir pour Sa Majeſæ Imperiale, Couragie, mes Enfans, [ 5 ]ende heeft terstont zijne trouppen in Campaigne ghestelt, ende de Esquadrons in Ordre, d’welc oock den vyandt dede van ghelijcken met 18. Cornetten peerden, in diversche trouppen, Conte Bucquoy voerden t’volck aen ende was in den eersten puncte van de Cavaillere, ende weken tot voorby de Embuscade, den vyant quam voor d’eerste met duysent Cuyrassiers, ons volck gaff een chargie van Musquetten daer onder den vyant, waer over terstont tusschen de 3. ende vier hondert van de peerde vielen, terstont secondeerden den Coronel Gauchie den eersten trouppe van de Cosacquen met hondert peerden, ende door t’Commandement van den Generael Bucquoy, retireerden zy hun met 400. peerden achterwaerts.
Den Graeff van Bucquoy voechden hem wederom met de Cavaillerie onder den vyant, voor aen, ende creech eenen scheut van een Coup de Pistole, de welcke hem af brande, ende mede nam een partije van zijnen Casacque, andere segghen de Pluymen werden van zijnen Coppe geschoten, zijn peert wert onder hem doot gheschoten met 4. scheuten van Pistole, waer van het viel met den 4. scheut, daer werden veel scheuten van pistolen op hem ghelost, den vyant begost te stauwen, ende de vlucht te nemen, haren Oversten van de Cavaillerie was den Baron Kintsky, [ 6 ]de welcke hadde den fleur oft blomme van de Cavaillerie onder zijn ghebiedt, de welcke waren 18. Cornetten peerden by de 2. duysent, waer onder waren 5. oft 6. Hollantsche Compagnien, ende veel Adeldom van Bohemen, daer bleven doot 1500. vanden vyant, onse Ruyterije drevense en vervolckdense tot in hunne Quartieren, meer als een halve duytsche mijle waren de velden bedeckt van de dooden.
De principaelste naemen vande Overste vanden vyant die daer ghebleven zijn.
Den Luytenant Coronel van Kintsky, en Maerschalck du Camp, ghenaempt den Baron de Felssz een van de principaelste Rebellen is doot ghebleven, ende dry andere Cornetten.
Den Oversten Sergiant Mayor ghenaempt, Hauwits Bernheym doot ghebleven, den Ritmeester Loben, met noch 60. van de principaelste Edelmans doot ghebleven.
Den oversten Luytenant Haugwitz, Keeteleer doot ghebleuen.
Den oversten Cappiteyn Smolensky, met noch andere Cappiteynen, ende veel Bevels-hebberen zijn der doot ghebleuen.
Noch eenen soomen seyt van Ducqs de Saxe die was op de zijde van de Boheemsche doodt, in het spoelleren ende ontcleeden van de dooden heeft men [ 7 ]aen de habijten ghesien ende lijnwaert, dat het grooten Adel moesten wesen, ende soomen verstaet vande ghevanghenen.
De Cornette van den Grave van Hollack is genomen, men hadde ghevanghen ghenomen ontrent 200. ghevanghenen van den vyant maer de Cosagghen die de bataille begosten, vermoordense altemael behaluen 2. oft 3. Cappiteynen ende eenighe Edelmans.
Van onser zijden blevender maer 10. oft 12. soldaten ten hoochsten waer onder was eenen Cappiteyn van de trouppen, Entreteneur van den Hertoch van Florencen.
Den Heere Sieur Bienque, Bucquoys Cosijn, wert ghequetst in zijnen bil, daer zijn noch een oft 2. Cappiteynen van de onse ghequetst gheworden.
Den Graeff van Dampier vervolchden den vyant noch met duysent Peerden ende duysent Voetknechten, die wederom aenghevoert werden van den Generael Bucquoy, de welcke niet en costen volgen, bleven achter, des vyants voetknechten stonden op eenen berch, men seyt hadden de Cosagghen een weynich patience ghehadt oft willen hebben allen de Infanterie oft voetvolck die de Cavaillerie van de Boheemsche volchden, ende achter aen quamen, (want de Rebellen hun Quartier veranderden) souden [ 8 ]alle ghebleven hebben, ende in stucken ghehouwen gheweest, maer de Cosaggen waren te furieus, ons volck hebben ghecreghen eenen grooten Buet, ende 9. oft 10. Cornetten ghenomen, de Cosagghen hadden meer als duysent peerden voor haren Buet.
Dit nu gheeyndicht zijnde dese bataille, als men begost te plunderen, de velden waren bedeckt van de dooden, de peerden vanden vyant liepen daer met honderden tot Buet, Fraeye Cleederen, Keulders, Mantels met Goude ende Silvere Passement geboort, fraey Pistolen, ende Gheweer was daer ghenoech om crijghen, want ont ontcleeden van de dooden sachmen datter veel Edeldom onder was, soo van schoon ende fijn Lijnwaet ende cleederen, die sy aen hadden.
Dese bataille gheschiedt zijnde voor den noen op Palmensondach, ende des snachts te voren noch gevrosen was, soo begost het te dooden, ende den wech heel slijckachtich te worden, met eenen mist die daer viel, soo is zijn Excellentie de Bucquoy wederom te rugghe ghetrocken met een goede ordre in zijn oudt Quartier, met allen de Ammonitie waghens, sonder verlies meer van eenighe Soldaten, geschut oft Ammonitie, met eenen grooten Buet waer over de Soldaten dansten en sprongen, ende quam vrolijck wederom t’huys.
Leest voorder in het boecxken Q. wat den Graeff van Bucquoy voorders ingenomen heeft.