Oomkens feeste vanden sotten
|
Oomkens feeste vanden sotten | |
| Auteur | anoniem |
| Genre(s) | kroniek (fragment) |
| Brontaal | Middelnederlands |
| Datering | 16e eeuw |
| Bron | Willem Van Eeghem, Rhetores Bruxellenses (16de eeuw), in: Revue belge de philologie et d'histoire, tome 15, fasc. 1, 1936, p. 47-78 |
| Auteursrecht | Publiek domein |
 | |
Jnt selue jaer opden xxten dach der maent van julio wordde te bruessele eenen feeste ende genuechte ende tryumphe opgestelt vanden sotten die aldaer van diuerssche landen steden dorpen vryheden ende anderssins waeren commende ter seluer feesten/ welcke feesten oft spel hadde opgestelt een genaempt Jan colyns een schildere van synen ambachte diemen hiet inde wandelinghe Oomken allet dwelck een oubollich ende vrempt dinck om sien was/ tot welcker feesten waeren te wynnene diuerssche siluere prysen/ Het dysendaighs daer na soe dede de prinche van allen den sotten geheeten Omken/ met allen den sotten de welcke tot bruessel tsynder feesten gecommen waeren/ eenen propelycken triumphelycken kerckganck dwelck gebuerde voer der noenen/ gaende vander merct van bruessele alsoe ten houe toe vander K. Mat, omme den puttenborre aldaer staende/ allet dwelck vrouwe leonora de conninginne douwagiere van vranckerycke/ ende vrouwe Marie haer sustere siende waeren Ende van daer soe gingen alle de voirscreuen sotten/ met hueren prinche Oomken [de welcke altyt was rydende op een cleyn Eeselken] ter houtmerct toe nader kercken van sinter goedelen/ aldaermen den dienste metten sangers jn discante ende metten grooten orgelen pontificalyck was doende/
Jtem den voirscreuen dienst gedaen synde Soe quamen de voirscreuen sotten van sinter goedelen de stormstrate aff ende alsoe voere der predicaren cloostere ter cortter ridderstraten toe voerbijder bekeerder sonderssen cloostere/ voere sinter claes kercke ende alsoe ter merct toe gaende dwelck oyck seere oubollich om sien was want totten seluen kerckgange was eenen besunderen prys gestelt wye dien ter minster cost ende ten fraeysten conste gedoen.
Item ten seluen daige nader noenen Soe quam oomken de prinche vanden seluen sotten die welcke dese feeste opgestelt hadde met alle synen state op het tanneel oft spectacule dwelck op de merct genaect was/ aldaer hy doende was justicie/ ende dat nade delicten dwelck de sotten mochten mesdaen hebben
Item des goensdaighs daer na soe vergaderden alle de voirscreuen sotten opt voirscreuen tanneel voere het stadt huys van bruessele tusschen xj ende xij vren vander noenen ende waeren daer opt selue taneel eetende een goet vet gebraden costelyck calff daer toe de voirscreuen prinche alle de sotten tot synder feesten ontboden ende genoot hadde allet dwelck gebuerde voer tvoirscreuen stadthuys opt selue spectacule oft taneel jn grooter tryumphen ende met vrolycheyden/ daer de prinche voirscreuen met allen synen sotten sittende al aen eenen taeffele vergadert waeren/ slaende de trompetten ende claronen ende spelende alderhande spel soe langhe den seluen maeltyt was geduerende allet twelck te langhe waere om scriuen oft om te verhalene
Item des donderdaighs/ daer na soe staken opde voirscreuen merct de sotten om prys te wynnene dier op gestelt was/ sittende op peerdekens van wymen gemaect/ doen waeren de voirscreuen sotten jn grooten tryumphe ende genuechten Opde voirscreuen merct wordde alsdoen oyck eenen tynte gespert/ daer de beroepers vuyt quamen ende was doen tertyt te bruessele gecommen vele volcx van diuersse/ steden/ landen/ plaetssen ende dorpen/ om de voirscreuen feeste te aensiene vanden beghinsele totten eynde soe datmen tselue nyet gelouen en soude men hadt gesien
Den hooghsten prys van steekenen hadden de sotten van rysele/
Item des vrydaigs/ des saterdaighs ende des sondaighs daer na/ drye daighen lanck geduerende Soe waeren de voirscreuen sotten voirtstellende jn alle straten ende wycken van bruessele ende oyck bybringende alle genuechte die sy consten oft mochten versieren oft gefantiseren was (l. want) daer oyck prys op gestelt was/ allet dwelck voirtstel byden seluen sotten bedreuen was seere genoechelyck om sien ende om te belachene De sot van valenchyne hadde daer aff den hoogsten prys/ want hy de beste factien ende de meeste genoechte was stellende ende bybringende
Item des maendaighs daer na/ Soe waeren alle de voirscreuen sotten wyse luyden genaempt Ende opt broothuys geheeten des heeren huys was doen tertyt aldaer bereyt eenen schoonen costelycken maeltyt/ Daer toe dat vele heeren ende goede eerlycke mannen genoet waeren soe wel gheestelycke als weerlycke persoonen/ aldaer dat oyck aten alle die gheene die na Eenighe prysen van deser feesten gespelt hadden jnt sotte/ aldaermen henlieden elcken synen prys was gheuende na datsen verdient hadden/ Ende wordden doen aldaer vanden drye cameren vander Rethorycken van bruessele/ gespelt drye schoone schoone spelen ter eeren vander stadt van bruessele ende oyck ter eeren vanden goeden geselscape
Den hooghsten prys vanden factien te makene achter straten hadde de sot van valensyngne Den ij.en prys hadde de sot van [...] den derden prys hadde de sot van [...] Ende de sot van ryssele hadde den schoonsten prys van tschoenste jnnecommen
Jtem het dysendaighs daer na soe wordde de tryumphe ende genuechte vanden voirscreuen sotten al volbracht/ alsdoen dat een jegelyck mochte gaen ende trecken na syn quartier van daer hy gecommen was/
Jtem die van rysele waeren ter eeren vander stadt van bruessele spelende een cleyn battement aldaer dat sy lieden der seluer stadt grootelyck waeren bedanckende midts der eeren die sy henlieden bewesen hadden/ midts oyck dat sy lieden grootelycken hadden besconcken geweest vanden heeren vander reekencameren/ vanden tresorier general/ ende oyck vander voirscreuen stadt van bruessele/ die van rysele soe langhe de voirscreuen feeste dueren was waeren gelogeert opden gulden boom opde merct van bruessele aldaer sylieden geduerende den voirscreuenen tyt groot ghelt ende goet vertriumpheert ende verdaen hadden