gheweest ware. Isser oock eerlycker stadt gheweest als Jerusalem? die Romeynen omtrent 70 jaer nae Christi gheboorte, hebben die mede beleghert, inghenomen, verbrant, vernielt ende uytgeroeyet, in welcke crygh omghekomen syn elf mael hondert duysent menschen door hongersnoot, door 't sweert ende door pestilentie. Een Comeet heeft een jaer lang te voren over die stadt gehangen, als voorbode van sulcken ellende. Ick moet lachen, wanneer ick by seneca lese hoe dat by neronis regieringe een comeet gesien is gheweest ses maenden lang, gaende uyt het Noorder qnartier Suydwestan; hic (zegt seneca) detraxit Cometis infamiam, laetissimo principatu. Dat is te seggen: anderen Cometen brengen ghemeenlyck droevighe tyden maer dese Comeet brengt ons alle geluck onder die blyde regieringe, van onse genadichste keyser nero. Also plagh broer cornelis te preecken van syn Cousyn Duc d'Alve, hoewel met minder profyt als seneca. Item in 't jaer Christi 677 in Augusto een Comeet rees op in t' Ooste omtrent middernacht, ende duyrde drie maenten lang. Waer nae volgde eene grote sterfte, beginnende in die Oostersche landen. Noch anno 1337 sach men twee cometen op eenen tydt. Die eerste scheen twee maenten alleen, ende dan noch twee maenten met een anderen Comeet. Niet seer lange nae dien tydt ontstack een sware pestilentie. Plinius meent dat niemant twee Cometen op een tydt gesien heeft als aristoteles alleen. Julius Scaliger schryft mede gesien te hebben twee Cometen op een tydt: waervan den eenen scheen smorgens, ende die ander savonts, die eene nae 't Suyden, de ander nae 't Noorden toe wyckende.
Men leest van eenige bruyn gheverfde Cometen. Die eene int jaar 1402 hebbende een seer lange steert gekeert nae 't Noordwesten; in welcke jaer sterf de grote tamerlanes ende rees daerna veel moeyte onder die Christenen. Die tweede anno 1457 in Junio. Dese Comeet sach men in de Hemelsche teecken Pisces. Die derde bleeckswarte Comeet sach men int jaer 1477 als carolus die stoute voor Nansi gheslaghen wert. Noch lesen wy van een sonderlinghe Comeet erschenen in 't begin van 't jaer 1472 in libra, wiens stert ofte voorschynsel seer was lang streckende Westwaerts. Sy duyrde omtrent een maent ende trock Noordtwaerts nae Arcturus, ende dan
