ken, hebbende den selven met mijne Heeren den Connestebel van Montmorency ende Mareschal van S. Andre alleene ende besonderlick gehandelt, ter grooter instantie van den Coninck, die ons voor seker verclaerde, dat den meesten dienst dien wy hem ter weerelt souden connen doen, was den paeys te maecken, ende dat hy dien in alle manieren begheerde, hoe diere dat hy hem oock soude moeten costen, om dies willen dat hy ghesint was nae Spaegnien te verreysen. Maer dat en conde al niet helpen, om te maken dat hy selve ofte zijnen Raedt soo wel van Spaegniaerden als van veelen wt desen landen ghecomposeert (die teghen ulieden ende uwe vryheyt metgaders teghen t'gantsche landt altijd eenen gheduerighen haet hebben gedraghen) souden ulieden eenighen danck weten van een soo merckelicke hulpe als de voorschreven bede was, ofte van soo gheluckighe executie als daer naer is gevolcht: Ja ter contrarien, sy hielden dese subventie voor een crime ende misdaet teghen de Majesteyt, om de welcke ghylieden (ende voornemelick wijlen mijn Heere van Lalaing) sententie van lijfstraffe met rechten scheent verdient te hebben; in sonderheyt wt dese oorsaken, Om dat men hen de selve niet eer en heeft willen ver-
