eensdeels dus langhe ghedraghen, ware tot dien eynde alteene geschiet ende voorghenomen om den staer onses vaderlants te versekeren ende in zijn wesen te onderhouden: Dat in sulcken ghevalle, den heymelicken ende verborghenen haet, doer de quaetwillighe al over lange tegen dese landen ende alle eerlicke luyden ghevaett, eensganghs ware wtghebroken veel liever over onsen persoon alleene, dan over soo veel luyden van eeren, ja over de ghemeynte van alle desen landen: Doch op conditie, dat wy soo wel voor de gerustheye onser eyghen conscientie, als tot bewaernisse onser eere, metgaders van onsen goeden name ende fame by allen volcken ende nacomelinghen, hier van eens mochten voor alle de weerelt een heerlick ende openbaer ghetuyghenis verwerven : Soo ist dat wy dusdanighe onse begheerte tot onsen grooten vernoeghen regenwoordelick hebben vercreghen, door 't middel van dese wreede ende barbarische verbanninghe, strijdende teghen alle goddelicke ende weereitlicke rechten, ende diergelijcken in desen landen (die onder allen anderen natien van wegen harer wtnemende vriendelicheyt ende beleestheyt sonderlick vermaert sijn) noyt ghene en is gehoort ofte gesien worden. Want hoewel
