verstoorende? In der voeghen dat de Spaegniaerts ende hare aenhanghers daer sy meynden ons groot leedt ende spijt mede aen te doen, als door dese schandelicke verbanninghe, hebben ons veel eer door dezelve een sonderlinghe vriendschap ghedaen, ende oorsake gegeven, om ons dies te meer te verblijden: dewijle dat sy buyten onsen wensch en ons dese bane hebben gheopent om ons selven te moghen verantwoorden, ende om de geheele weerelt kennelick te maken die billicheyt ende gherechticheyt van onse aenslaghen ende voornemen: verlatende onsen nacomelinghen mids desen eenen patroon van deuchden, om naeghevolcht te werden van allen den ghenen die daer gheen schande sullen willen aendoen der edele afcomste voor onse voorouderen: onder den welcken noyt niet, eenen heest de tyrannije toeghedaen gheweest, ofte eenichsins voorghestaen, maer hebben alle ghelijck bemint, ende nae haren staet vervordert de vryheyt der volcken over de welcke sy eenighe macht oste bevel hadden. Ende hoe wel dat wy geen sonderlinghe oorsake en hebben ons te beclaghen, als hadden wy hier te vooren niet stoffe ghenoech gehadt om vry te mogen spreken van ons selven, ende te straffen de grove ende ongheschickte fauten van onse vyanden:
