ende met ydel waenhope ophouden, ten minsten met hare vergiftighe tonghen, die van joncks op tot soo oneerlick ende schandelick een ambacht ghewennet zijn, proeven te verwonden?
Daer wert rechts inden beginne een groot verhael ghedaen, van diversche weldaden, die wy van de K. M. souden ontfanghen hebben, nopende de successie van wijlen mijn Heere de Prince van Orangien, onsen neve: ende dat ons de Coninck soude Ridder van zijner orden ghemaeckt hebben: ende zijnen Lieutenant generael in t'gouvernement van Hollandt, Zeelands, Vtrecht ende Bourgoignen oock van zijnen Rade van Staten. Maer waer toe alle dese dinghen ? Om te bewijzen dat wy aen t'huys van Spaegnien grootelicx ghehouden zijn, ende dat wy niet en connen ontgaen, os wy moeten van ondanckbaerheyt overtuycht werden: ende ten anderen, nademael dat wy wt saken van eeden van manschap ende trouwicheyt hem ghedaen in t'verhessen van de leenes, steden, lantschappen ende heerlickheden, die wy in diversche zijne landen ende provincien van hem waren houdende, grootelicks verbonden ende verplicht waren ons te begheven tot zijner ghehoorsaemheyt ende dienst, metgaders die welvaert zijner saken te vervoor-
