Pagina:Courante uyt Italien, Duytslandt, &c. 1620-12-12.djvu/2

Uit Wikisource
Deze pagina is proefgelezen

Ondertusschen was dat Landt-volck overal seer onrustich, ende mochte eyndelijck wel eenen Boeren-Crijgh ontstaen.
 Hadden oock advys uy Neurenbergh, dat als des Keysers in Praghe ligghende Soldaeten die Stadt wilden spoelieren, de Borghers sich te samender hant, met een deel Crijgsvolck inde Wapenen begheven, ende die ghenoemde Soldaeten daer nyt gheslaeghen, met verlies van ettelijcke duysent derselve, wat hier van is, salmen ten naesten breeder hooren.
 Brieven uyt Eger melden, dat die Coninginne van Bohemen sich tot Brin bevont, maer dat die Coninck in aller haest nae Presburg tot den Coninck van Hungarien Betel Gabor ghetrocken, ende van daer weder tot Brin in Moravien aen ghecomen was, hebbende niet alleen die Croon, Schepter, Lants-gulden-tafel, ende andere Juweelen, maer oock die gantsche Secretarye, met den aencleven van dien, met hem genomen: Ende hadde noch by den anderen over de 3000 Peerden, versamelende voorts dat overbleven Crijgsvolck. Ende hout men voor seecker, dat Bethel Gabor oock metten eersten sich met 30. duysent Mannen op maecken, ende tot den Coninc van Bohemen vervoeghen soude.
 Wy hebben advijs uyt der Lausnits, dat de Churvorst van Saxsen een goedt deel volcks te Peerde ende te voet, met eenighe Stucken Gheschut, ende Crijghs munitien naer Liebau ghesonden hadde, maer ve Marc-grave van Jagerendorp was haer te ghemoete ghetrocken met zynen Legher, ende schier den gheheelen dagh eerst met grof Gheschut, daer na met Scharmutseringen aen een ander gheweest, also dat die gevangenen bekent hebben, datter een goedt deel van des Churvorsten volck doot gebleven was, ende by nachte weder te rugghe ghetrocken waren.

 Wt Engelant verstaetmen dat het Perlement tot Londen metten eersten soude gehouden werden, ende dat die ghevangene aldaer sullen gheexamineert, ende die Catolycke Contribuanten in Enghelant beschreven, ende naer behooren tegens hun gheprocedeert werden.

 De Coninck van Dennemarck soude neffens den Hertoch van Bruynswijc ende andere Princen nu oock gantslijck geresolveert syn, den Coninck van Enghelant, van weghen syne voor hebbende Entreprinse, de Churvorstlijcke Palts aengaende, met volck ende andersins t’assisteren.

 Wt Vrancrijc heeftmen, datter eenige Ambasdeurs tot Parijs by den Coninck starck voor die van der Religie in Vrancrijck intercedeerden, datmen met hun wat sachtmoedigher handelen soude. Men segt, dat sich de Coninck nu een anders ende beters soude gheresolveert hebben.

 Van Barcelona wert geadviseert, dat de Marquis van S. Croys, met 7. Galleijen, 2. Turcksche Schepen ende eenighe andere Rovers teghen ghevaren, met de selve langhe ghestreden, dat beydersydts veele ghebleven waren, daer nae is de Marquis weder nae Barcelona ghevaren, om sich weder te Armeren, ende die Rovers te vervolgen: Aen dieselve plaetsen doen andere Zee-roovers oock grooten schade, hebben een Stedeken int Coninckrijck Granada gheplondert, ende veel volcks wech ghevoert, ’twelc dan in Jabea int Coninckrijck Valencen oock gheschiet is, daerom beveel ghedaen was, middelen te ghebruycken, om deselve te bejegenen.


’t Amſterdam by Ioris Veseler, Ao. 1620. Den 12. December. Voor Caſpar van Hilten, aen de Beurs inden gecroonden Hoedt.