8
van Strackowitz comen hier tot Praghe datmense soude beschermen ende helpen, wandt en connen des Keysers volck niet wederstaen, soo niet moeten de steden ouer gheuen. Don Balthasar heeft van Keysers weghen gheschreven aen de stadt Zabislauw 2. mijlen van Thabor, dat sy hem van Keysers wegen goetwillich souden in laten ende ouer gheuen wt wijsende zijne Patenten, oft anders wilden hy te vier ende te sweerde haer vernielen, waer ouer hier wt Praghe is ghesonden den Hauptman Semler met zijn twee Vendelen volckx om daer henen te trecken, hier zijn noch eenige wagens met Amonitie ende twee Cartouwen naer Pissegh ghevoert, met noch twee Vendelen Soldaten om de stadt te besetten.
Wt Weenen.
s’Keysers volck leyt meestendeel hier om S. Polten by der Donauw, den Graef bevint hem met veel volckx by Wilffers-dorf ses mijlen van hier, ende trect naer Moravien toe, daer toe by hem gereet waren tweelf waghens met storm-leeren.
Door advis van de Bemersche hebben die van Moravien, allen die Gheestelijcke goederen verbeurt ende gheconfisqueert, verjaghen de Geestelijckheydt ende vercoopen alles voor de hant, hebben tot gelde ghemaeckt ende vercocht de weerde van acht Tonnen Goudts, om de Soldaten te betalen.
FINIS.
Imprimi poterit P. C. C. A.
