6
chische Frontieren gheleydt worden, daer leydt by Flackenauw oock by de twee duysent Weinmarisch volck.
Wt Augsburgh van den 20. Mey.
Sijne Doorluchtighe Furstlijcke den Hertoch van Beyerens Chrijsch-volck marcheerdt alles op nae Thonauwehrt, Rein, ende Wendighen toe, sy hebben by hun 60. groote metalen stucken Geschut, ende zijn ouer de dertich duysent mannen sterck, deser daghen zijnder inde 40. schepen met ghereetschap ende provande wt neder Beyeren toe comen, men verstaedt die Vnion wilt by Nordlinghen eenen Legher slaen, van 8000. Peerden ende zeven Regimenten voedtvolckx.
Wt den ouer Elsasz van 20. Mey.
In deser Landen wort het daghelijcx ongheruster dat volck wt Lorreynen is sterck om t’aensien, ende passeren hier op dry uren nae by der Stadt Straesburgh by honderden seffens, maer en doen aen geenen mensche eenich hinder oft letsel, ende sullen eer weynigh daghen xiiij. duysent te voet ende te Peerde hier int Landt zijn, Die Switzers hebben die Stadt Mulhausen sterck bezedt, ende die van Straesburg doen allen haer Gheschudt weder op die vesten voeren. Den Marquis van Baden leyt noch by Brysach wel sterck beschanst, ende houdt scherpe wacht.
