8
Wt Praghe 1620.
En Maendaeghe is den Ottomanischen Ambassadeur Heer Collin met 8. waghens vertrocken, ende met alle de Cauallerie gheconvoyeert worden, draecht groote presenten met hem.
Over twee daeghen is eenen Courier wt Hungheren alhier ghearriveert, die brenght mede, als datter eenen Turckschen Ambassadeur in compagnie van eenen van Bethlehem Gabor op wech is om herwaerts te kommen, ende teghen Sondaechs alhier soude arriveren, daeromme is aen allen de Borgerije van Praghe belast worden, hun ghereet te maecken soo te voete als te peerde om den selven Ambassadeur met alle Magnificentie te ontfanghen. De selve Curier seght dat op den Vngherschen Landt-dach by 14000. mannen by een zijn, ende dat Betlehem Gabor 1000. Mannen heeft ghekleet in eender Liurey, die hem dienen tot zijn Lijff-guardie, Voorts soo ligghender inde Bosschen ende Frontieren inde 40000. mannen, hoe den selven Landt-dach sal eyndighen leert den tijt.
Wt de Marckt hebben wy dat het Engelsche Krijchs-volck, aldaer begint te arriveren, ende soude het Marckgraeffsche Krijchsvolck inde weecke naer Trinitati, ontrent Franckfort aender aeder ghemonstert worden. In Polen ende Slesien is het nu ter tijt stil, van daer is Tijdinghe dat de Tartarien inde Podolien souden ghevallen zijn, maer zijn vande Polen gheslaghen gheworden, ende zy hebben oock eenighe Slesische Edellieden ghevangen, de welcke (soo te besorghen is) in groot perijckel sullen wesen.
