7
Wt Vlm van xxiij. Junij 1620.
Het Crijchs-volck dat int Elsas gheleghen heeft, compt vast aen, ende vergaderen hun tot Biberach, zijn inde neghen duysent mannen sterck, oft de selve nu by het Beyersche volck sullen comen, ende alsoo ghelijcker handt naer Oostenrijk, oft Bohemien trecken sullen, en weetmen niet, Hoe wel t’selve seer beducht wordt.
Den Marcgraeff van Baden brenght zijn Crijchs volck oock opwaerts. Interim heeft den Hertoge van Beyeren eenen treffelijcke Ambassadeur alhier ghesonden, ende den Ambassadeur van Vranckrijck is oock noch al hier, dan alsoo dese vergaderinghe binnen twee oft dry daghen een eynde sal hebben sal hy naer Weenen verreysen.
Onsen legher leyt noch ontrent Leypheym, daer en is gheen ghebreck aen victualie, maer het water quelt hun seer, alsoo dat te vreesen is, datse sullen moeten op breecken, het welck sonder groote schade, ende perijckel niet en kan gheschieden.
De Beyersche verschantsen hun oock, zy hebben twee leghers, den eenen leyt by Guntsberch, ende den anderen by Peeters weert, souden oock vant water groot onghemack lijden. Interim en worter noch yet bysonders wtgherecht.
