8
als vande Miserie ende Armoede van hunnen leger. Sy hebben een Commandement gedaen door het heel Coninckrijck van Bohemen dat de Borghers ende Buyten lieden moeten geuen voor elck huys 15. gulden, voor yder peert 3. voor Os ende Coe 2. ende voor het schaep eenen, soo dat alle het lant van Bohemen in oproer is, ende de Boeren die wel vijf duysent sterck inde wapenen zijn roepen oock liberteyt ende segghen datse willen zijn vande selue Conditie als de Duytschen, ende niet meer slaven, soo datter wat goets van te verwachten is mette hulpe Godts. Don Baltasar de Maradas Gouverneur van Budwijs is dese daghen met een deel volck wt ghetrocken, ende gheweest tot Soboslau toe, twee mijlen van Tabor, ende heefter ontrent 250. vanden vyant doot gheslaghen, ende soo meynden weder te keeren is oueruallen gheweest van 1200. Hongeren, dan heeft hen soo fraeye ghedefendeert, datse in de vluchte heeft ghebrocht ontrent 90. vande hunne doot gheslaghen, ende twintich gheuanghen. Den Heere sy ghelooft, men seght hier dat wy haest sullen 3. duysent Albanesen hebben.Daer is ghepasseert naer Praga eenen Turck, sy segghen dat hy gesonden is voor Ambassadeur aen dien alderliefsten Coninc van Bohemen, maer ick ghelooue dattet eene stratagema is van dese Caluinisten om de Ghemeynte in goede deuotie te houden.
