4
Den Marquis Spinola was zijn quartier recht ouer de stadt op dese zijde van den Rhijn.
Den 27. Augusti is den Marquis Spinola, met eene partije voetvolck ende peerden ghearriveert by de stadt van Mentz, in een Dorp gheheeten Castel, ende den seluen avont is noch met een deel Princen ende Heeren gaen vinden zijne Hoocheyt, den Prince Cheur-Vorst Aerts-bisschop van Mentz, ende naer dat hy eene wijle met zijne Hoocheydt ghesproken hadde is weder inden Legher ghekeert, Ende des anderen daechs, wesende den 28. is een partije vanden Legher ouer den Rhijn ghetrocken, ende hun seluen aldaer onder het Casteel beschanst, als oock de twee volghende daghen op den Berch van Sint Peeter.
Op desen tijdt heeft den Graeff van Tourlachs volck, Generael vanden Palatin in Brant ghesteken een Bourgaige by Franck-fort met t’sestich huysen toebehoorende den Bisschop van Mentz.
Den 31. heeft zijn Exc. den Marquis Spinola ghesonden aen de Magistraet van Franckfort, versoeckende datse hem souden willen eene partije Ponten en Schuyten seynden, het welcke hem alsoo gheconsenteert is, ende alsoo zijn twee Compagnien peerden ghesonden om de selue te accompaigneren, ende weder keerende vonden op d’ander zijde vanden
