7
Men verwachtense met alder blijdt, om te sien oftse yet wilden attenteren.
Den Marquis siende dat den Vyant niet met allen en roerden, maer datse daer vast bleuen staen, heeft strackx doen marcheren, twee Regimenten Infanterie op een Bergaigne, recht tegen ouer den heelen Legher van Dourlach, met vier Veldt-stucken, daer sijn wy ghebleuen een Musquet scheut verre van den vyant, maeckende seer groote ghenoechte met Trommelen ende Trompeteen.
Alle de Ruyterije ende Infanterie sijn soo alle den heelen nacht blijuen staen, sonder te vertrecken tot smaendaechs smorghens ontrent neghen uren, soo dat den vyant hem in zijn Trencheen vertrack.
Alsdoen heeft den Marquis Spinola de Ruyterije laten verversschen.
Het was donckerachtich weer, ende daer is eenen grooten reghen ghevallen, so dat het duerde by naer een ure, ende datmen qualijck te voete cost ghegaen van d’eene Compagnie in d’andere, oft ten was al slijck.
Leest voorder in het naervolghende, daer suldy breeder vinden.
FINIS.
