6
1000. Musquettiers, ontrent de palen van Mentz gheloopen dan zijn weder ghekeert sonder yet wt te rechten.
Sondach den 6. September is de Armee gemarcheert, ende ghepasseert zijnde een Bourg genaemt Nacken ontrent een quartier, op een vlack velt, hebben wy den Vyant in d’ooghe ghehadt, ligghende op eene berch, ende daer reden dry van haere Compagnien Ruyters wt, haren Legher comende lancx den Berch, dat was ontrent ten dry uren naer middach.
Sijn Exc. Marquis Spinola dat siende heeft 3. van zijne Compagnien Ruyters daer teghens wt ghesonden, ende wesende by malcanderen ontrendt eenen scheudt Musquets weechs, sijn daer blijuen staen, d’eene Compagnie voor, al achter den anderen, ende daer sijn sommighe stoute Soldaten van ons volck gheweest die tot by haerlieder zijn ghereden, met de Pistolen in de handt, d’ander sijn haer teghen ghecomen, ende hebben malcanderen aengesproken ende soo weder ghekeert.
Achter die dry Compagnien dede den Marquis noch vijf andere stellen.
Achter die vijf noch thien andere, ende daer naer noch vijfthien, ende soo de gheheele Ruyterije alle in slach-oorden ende in bataille seer lustich om sien.
