4
voor haren Gouuerneur, ende dat hen soude vry staen, naer zijne doot, eenen Coninck wt het huys Oostenrijck naer haere gheliefte te kiesen, tot welcken eynde sal de Fransche Ambassade derrewaerts reysen, omme te sien oft moghelijck waere eenich accoordt te maken.
Den Hertoch van Beyeren, naer dat hy het Lant op der Ens hadde beseth met volck, is ghetrocken naer Zweethal, ende heeft den Lieutenant Dronel Laurens di Maestro naer den Graue van Bucquoy ghesonden, om met hem te consulteren, op het opbreken, te samen comste, ende aengrijpen des Beemschen Leghers, dat oock den Cheurvorst van Saxen, van Lausnitz soude inghenomen hebben, om het vrempt volck dat de Bemen te hulpe treckt, den pas te benemen.
Dese weke zijn vande Staten van Retz alhier gecomen om te hulden ende manschap te doen de Heeren, Kuffsteiner, Verenbergher, Leister, ende Lempel, ende men verwacht daghelijckx noch meer, gelijcker oock veele ghecompareert zijn, totten beschrevenen Landtdach, die voor eenighe daghen is wtghestelt, ende op heden heeftmen aende Euangelische Borgherschap (die hen in’t voorleden iaer teghens henne Ouerheyt tot groot perijckel deser Stadt tsamen hadden verbonden) hen perdoen van s’Hofs we-
