4
hebben ghemaeckt, wy en hebben ooc van onser zijden niet naerghelaten te doen, al wat tot onderhout ende voort plantinghe van dien soude mogen dienstich geweest hebben, daeromme volherden wy daer inne al noch van onser zijden, soo dat behoort, ende het schrijven dat V.H. aens ons heeft ghedaen, en is ons gheenssints verdrietich, maer ter contrarien verblijden ons daer van seere, voor soo veele belangt de Krijsch-weruinghe, ofte ghereetschap van oorloge, des Eert-Hertochs Albertus, daer van hebben wy ouer langhen tijdt veel ghehoort, maer en hebben geen ander bescheedt daer van connen becommen, oft het oock alsoo was, ofte niet, ghelijck de ghemeyne advijsen mede brachten, tot dat den lesten haere H. den Eerts-Hertoch ouer weynich dagen ons t’selue heeft te kennen ghegheven, ende dat sulcx alleenelijc, ende tot gheenen anderen eynde en gheschiede, dan om hem, ende het Huys Oostenrijc te beschermen, ende henne landen te beschudden ende te bewaeren, maer niet (als selfs wesende eenen vande principaelste Staten des Rijcx) om teghens den opgherechten ende soo dier gecoste Religie ende Prophanen peys yet voorts te stellen ofte te attenteren, maer en heeft daer by int minste niet vermaent, waer henen zijn intentie was te trecken, soo en konnen wy V.H. daer van niet voorder informeren, als hier voren gheschreven staet,
